1 мин

Халдвар авсан байж болзошгүй хүүхдээ Хятадын онгоцны буудал дээр орхиод нисэн оджээ

О.Анхзаяа 2020.01.24

Коронавирус эрчимтэй тархаж, аюулын харанга дэгдээд буй энэ үед тус вирусийн голомт болсон Ухань хотын гадагшаа чиглэсэн бүх тээврийн хөдөлгөөний зогсоогоод байна. Учир нь вирус тархсан даруй хүмүүс хөрш зэргэлдээ хотууд руу ихээр дайжих болж, үүнээс үүдэн тархалт улам ихэссэн юм.

Энэ үеэр Нанжин Лукоу олон улсын нисэх онгоцны буудал дээр коронавирусийн халдвар туссан байж магадгүй хоёр хүүхдийг ажилчид саатуулжээ. Шинж тэмдгүүдийг нь хараад онгоцонд суулгахгүй хэмээн эсэргүүцсэн ч хүүхдүүдийн эцэг эх хэрүүл шуугиан дэгдээж, улмаар өөрсдөө онгоцонд суугаад нисэх онгоцны буудлыг орхин хөөрчээ. Цагдаа болон ажилчид тэднийг зогсоож дийлээгүй аж. Одоогоор нисэх онгоцны буудлын ажилчид хүүхдүүдэд санаа тавьж байна.

Зорчигчдын хэлснээр зорчигчдыг суулгах хаалгыг таглан зогсож, маргаан үүсгэснээс болж онгоц 3 цаг саатсан гэжээ.

Коронавирус нь SARS гэгддэг амьсгалын замын хурц халдварт өвчний вирустэй төстэй, амьтдын дунд элбэг тохиолддог вирусийн томоохон бүлэг юм. SARS-ийн дэгдэлтийн үеэр халдвар авсан хүмүүсийн 10 орчим хувь нь амиа алдаж байжээ. Коронавирусээс хамгаалах вакцин байхгүй учраас халдвар авсан хүнтэй харьцахгүй байх нь гол урьдчилан сэргийлэлт юм. Мөн гараа ам, хамар, нүдэндээ хүргэхээс зайлсхийж, савантай бүлээн усаар тогтмол угаахыг зөвлөж байна. Өвчний шинж тэмдэг илэрвэл олон нийтийн газраар явахаас зайлсхийж, бусад хүнтэй гар барих, шүргэлцэх, ойртохоос зайлсхийгээрэй. Ханиаж, найтаахдаа ам, хамраа таглахыг сануулжээ.