3 мин

Коронавирусын тархалт, өвчлөлийн тухай хамгийн сүүлийн үеийн баталгаат баримтууд

Ж.Мөнхзул 2020.01.25 17 15 4

812

Коронавирус хэнд хамгийн хүнд тусах вэ?

Лондонгийн Империал коллежийн Халдварт өвчний клиник судалгааны багийн мэдээлж буйгаар коронавирус дунд болон дундаас дээш насны, тэр дундаа төрөл бүрийн суурь өвчтэй хүмүүст илүү хүнд тусах хандлагатай гэнэ. Судалгааны багийн гишүүн Натали МакДорматтын өгүүлснээр уг вирус залуу хүмүүст энгийн, хүндэвтэр ханиад шиг шинж тэмдгээр илрэх магадлал өндөр аж. Гэвч зөвхөн томчуудад хүнд тусна гэж хязгаарлагдмал ойлгож, хүүхдүүдээ өвчнөөс сэргийлэхэд хайнга хандаж болохгүй юм. Манай орны нөхцөлд бага насны хүүхдийн уушгины хатгалгаа өндөр үзүүлэлттэй байдаг тул урд нь хатгалгаа туссан, хүндээр өвдсөн хүүхдүүдийг ДЭМБ болон ЭМЯ-ны зөвлөмжийн дагуу сайтар хамгаална уу. 

Хятадын ямар хотуудад тархаад байна вэ?

Урд хөршийн Ухань хотод дэгдсэн энэ вирусын халдвар хүрээгээ тэлж, одоогийн байдлаар Хятадын нутаг дэвсгэр дэх  18 хотод тархсан тухай "Аль Жазира" мэдээлжээ. Харин "Гардиан" сайт Хятадын 22 мужид яг одоо Нэгдүгээр зэрэглэлийн хөл хорио тогтоосон ба нийт 1287 хүн халдвар авсан нь батлагдсныг мэдээлэв. Өвөр Монголын өөртөө засах орны Шилийн Гол аймагт тус вирусын анхны тохиолдол нэгдүгээр сарын 24-нд бүртгэгдсэн ба түүнээс хойш Манжуур болон Эрээн хотод ахин хоёр хүн вирусын халдвартай болох нь батлагдаж, Хөлөнбуйр, Ордос, Шилийн Гол, Чифен зэрэг аймгуудад халдвартай байх магадлалтай таван иргэнийг тусгаарлаад байна. Эндээс анхаарал татаж буй нь манай улстай хил залгаа Эрээн хотод бүртгэгдсэн тохиолдол юм. 

Дэлхий даяар хэчнээн хүн халдвар авсан бэ?

BBC агентлагийн хамгийн сүүлийн мэдээллээр дэлхий даяар нийт 1300 хүн халдвар авсан нь тогтоогдсон бөгөөд 41 хүн нас бараад байна. Нас барсан өвчтнүүдийн дотор Ухань хотод халдварын голомтон дээр ажиллаж байсан 62 болон 51 настай хоёр эмч буй нь дэлхий нийтийг сэртхийлгэлээ. Халдвар авсан хүмүүсийн хамгийн залуу нь Хятадын Гуангси мужийн хоёр настай хүүхэд байгаа юм байна. Вирусын тохиолдол Тайланд, Хонгконг, Австрали, Франц, Япон, Сингапур, Тайван, Вьетнам, БНСУ, АНУ, Непал, Малайз зэрэг 12 оронд албан ёсоор бүртгэгдээд байна. Британид сэжигтэй 14 тохиолдыг шинжилж үзээд коронавирус биш хэмэн мэдэгдэв.

Ямар шинж тэмдэг илрэх вэ?

Энэхүү шинэ төрлийн коронавирус нь (nCov) урд нь хүний биед илэрч байгаагүй шинэ хүрээний вирус бөгөөд амьсгалын дээд замын хурц өвчлөл үүсгэж, амь насанд аюултайд тооцогдож буй юм. Английн эрдэмтэд халдвар авснаас 3-6 хоногийн дараа эхний шинж тэмдэг илрэнэ гэж зарласан. ДЭМБ-ын анхааруулснаар өвчний эхний шинж тэмдгүүд толгой өвдөж, халуурснаар эхлэх ба дараа нь хуурай ханиалгаж, барагцаагаар долоо хоногийн дараачаас амьсгалын дутагдалд орох шинж илэрнэ гэжээ. Хүндэрсэн тохиолдолд уушгины хатгалгаа, бөөрний дутагдал болж, амь насанд хүрэх аюултай юм. 

Тус вирусээс сэргийлэхийн тулд та:

- гараа тогтмол савандаж угаах, спиртэн суурьтай гар ариутгагч хэрэглэх

- ханиаж, найтаахдаа амаа гарынхаа шуу хэсгээр, эсвэл амны цаасаар дарах

- ханиадтай болон халуунтай хүнтэй ойртохгүй байх

-халуурч, ханиалгасан тохиолдолд яаралтай эмнэлэгт хандах

- амны хаалт байнга зүүх

- өвчлөл гарсан улс оронд зорчихгүй байх

- олон нийтийн газраар шаардлагагүй тохиолдолд явахгүй байх хэрэгтэй. 

Одоогийн байдлаар тус вирустэй холбоотой нэг сайн мэдээ байгаа нь энэхүү халдвар 2002 онд гарсан SARS-ын халдвараас хөнөөл багатай байх төлөвтэй гэж Британийн эрдэмтэд мэдээллэж байна. Дэлхий даяар мэдээлэл хурдацтай тархаж, урьдчилан сэргийлэх ажлыг эрт зохион байгуулж чадсан нь үүнд нөлөөлнө хэмээн үзэж буй юм. Одоогийн байдлаар энэ вирусын халдвар Монгол Улсад албан ёсоор бүртгэгдээгүй. Гэсэн хэдий ч хилийн цаад дахь Эрээн хотод халдварын тохиолдол бүртгэгдсэн тул иргэд эмнэлгийн байгууллагын зөвлөмжийн дагуу, өвчнөөс сэргийлэх арга хэмжээг сайтар авна уу.

Ж.Мөнхзул 2020.01.25

812