Коронавирусийн халдварын тохиолдол нэгээр нэмэгдэж, хоёр хүн эдгэрч, ХӨСҮТ-өөс гарчээ
Эрүүл мэндийн яамнаас ээлжит хэвлэлийн хурлаа хийлээ.
Энэ үеэр ХӨСҮТ-ийн захирал Д.Нямхүү "Өчигдөр буюу тавдугаар сарын 21-нд ХӨСҮТ-ийн хоёр, ЗӨСҮТ-ийн нэг, Дархан-Уул аймгийн нэг нийт дөрвөн лабораторид 403 хүнд шинжилгээ хийлээ. Үүнээс 402 хүний шинжилгээнд коронавирус илрээгүй. ХӨСҮТ-д тусгаарлагдаж байгаа 48 хүнээс авсан давтан шинжилгээгээр нэг хүнээс халдвар илэрсэн. Тавдугаар сарын 13-нд ОХУ-аас ирсэн цэргийн сургуулийн оюутнаас илэрлээ.
Тавдугаар сарын 13-нд ирсэн оюутнуудаас анх 55 тохиолдол илэрч байсан бол давтан шинжилгээнүүдээр нэмэгдэж, 57 тохиолдол болж байна.
Тандалтын зорилгоор 13 хүнд шинжилгээ хийхэд коронавирус илрээгүй. Дархан-Уул аймагт нийт 47 шинжилгээ хийгдсэний 27 нь Алтанбулаг боомтоор орж ирсэн жолооч бол бусад нь аймгийн нэгдсэн эмнэлгэд тусгаарлагдаж байгаа иргэдийн давтан шинжилгээ юм.
Сайн мэдээ байна. Өнөөдөр дахин хоёр иргэн эдгэрч ХӨСҮТ-өөс гарч, дараагийн шатны тусгаарлалт руу шилжлээ. Хүмүүсийн эмчлэгдэж байгаа дундаж хугацаа 30-40 хоног байна" гэв.