6 мин

Коронавирусийн улмаас эмнэлэгт “хоригдож” буй хүүхдүүдийн яриа

Ub.life 2021.01.20 36 3 2

14

Коронавирусын халдвар авсан, эсвэл аав, ээж нь халдвар авсны улмаас аргагүйн эрхэнд харах хүнгүй дагаж ирсэн гээд янз бүрийн нөхцөлтэй олон хүүхэд эмнэлэгт “хоригдож” байна.

1 давхартаа 15 тасагтай. Тасаг бүрт багадаа 2, ихдээ 6 хүн хэвтэнэ.

Хан-Уул дүүргийн 300 орт гэгдэх төрөх эмнэлэг. 140 ортой амаржих газар, 160 ортой хүүхдийн төрөлжсөн нарийн мэргэжлийн төв бүхий эх, хүүхдийн цогц эмнэлэг болох юм байна. Цар тахлын үед энэ эмнэлэг халдвар аваад эдгэрсэн хүмүүсийг ажиглалтад байлгахад ашиглагдаж буй.

ХӨСҮТ-д 14 хоног эмчлүүлснийхээ дараа ажиглалтад “Хан-Уул дүүргийн 300 орт” эмнэлэгт долоо хонохоор ирлээ. Ор хүрэлцээгүйн улмаас хүүхдийн тасагт хуваарилагджээ. Өнгөрсөн 14 хоногт чив чимээгүй саарал өрөөнд зэргэлдээх орны хүнтэйгээ л ярихгүй юм бол өөртэйгөө ярихаас өөр сонголтгүйд хүрдэг байсан би айж байлаа. Олигтой нийгмийн харилцаанд ороогүй удчихсан би хүүхдүүдийг сахилгагүйтэн гүйхээс, уйдсандаа уйлагнахаас нь айсан хэрэг л дээ. Хоёр хонож байтал коридороор сэмээрхэн гүйлдэх хүүхдүүдийн чимээ, бувар бувар ярих нь тэдэнтэй гарч очоод тогломоор санагдуулсан ч тэд угаасаа надтай тоглохгүй нь ойлгомжтой байсан болохоор миний асуултанд хариулж дөнгөх насны дөрвөн хүүхэдтэй ярилцахаар болов. Насанд хүрсэн бид ч гэртээ харихаа хоног тоолон хүлээж байхад хүүхдүүдэд бүр байж сууж ядам байгаа болов уу?

Ажиглалтад байгаа хүмүүс өрөөнөөс гарах хориотой. Нийтийн жорлонтой 3 өрөөний нэгд нь би орсон. Энэ бол нууцаар сэлгүүцэх боломж. Азтай гэхүү, азгүй гэхүү.

Б /8 настай/

-Эмнэлэгт хэвтэх ямар байна?

-Хоол өгөөд л, хэвтүүлээд л тийм ч муухай биш. Би тэгээд утсаараа тоглоом тоглодог. Миний утасны ихэнх тоглоом датагүй ч гэсэн ажилладаг юм. Заримдаа Youtube-ээс бичлэг үзэх дуртай болохоор нэг их уйдаагүй. Эмнэлгийн хоол нь хааяа хэцүү санагдсан. Би заримдаа хоолоо бүгдийг нь иддэг. Заримдаа бардаггүй.

-Хэнийг хамгийн их санаж байна?

-Ээж энд байгаа болохоор ээж лав биш. Эмээ ч энд байгаа болохоор эмээ ч бас биш. Аавыг юм байна. Аав маань одоо хүртэл нөгөө тоосгон эмнэлэгт байгаа. /ХӨСҮТ/ Бас гэрээ санаж байна.

-Эмнэлэгт хэвтэх хамгийн гоё бас муухай нь юу байсан бэ?

-Гоё гэхээр юм байхгүй ээ. Харин их хоол өгдөг нь муухай.

-Эмнэлгээс гараад хамгийн түрүүнд юу хиймээр байна?

-Гэртээ л очмоор байна. Гэртээ харивал датагүй интернэт ашиглана.

Э /12 настай/

-Эмнэлэгт хэвтэх ямар байна?

-Би өмнө нь нэг удаа эмнэлэгт хэвтэхдээ долоо л хонож байсан юм. Тэгээд дахиад эмнэлэгт хэвтмээр санагддаг байсан одоо бол ёстой үгүй. Дахиж л эмнэлэгт хэвтэхгүй юм шүү гэж бодож байна. Хийх юм байхгүй уйдахаараа би утсаа оролддог, хааяа зураг зурдаг.

-Хоолоо сайн идэж байгаа юу?

-Би 1, 2 дугаар хоолоо нэг дор идчихдэг. Хоол нь муухай ч биш, гоё ч биш байдаг л хоол санагдсан.

-Хэнийг хамгийн их санаж байна?

-Нохойгоо санаж байна. Манай нохойг Mike гэдэг. Одоо 7 сартай, спаниель. Гэрээ бол нээх санахгүй байна өө.

-Эмнэлэгт хэвтэхийн гоё бас муухай нь юу байсан бэ?

-Гадаа гарч болдоггүй нь хамгийн муухай. Гоё юм бол байхгүй гэхдээ заавал ямар нэг гоё зүйл хэл гэвэл энэ эмнэлгийн ор нь удирдлагатай дээшээ доошоо хөдөлж болдог нь л гоё юм даа.

-Эмнэлгээс гараад хамгийн түрүүнд юу хиймээр байна?

-Уг нь өнөөдөр манай аавын төрсөн өдөр болж байгаа юм. Даанч аав бид хоёр энд байгаа болохоор эмнэлгээс гарахаараа бид гэр бүлээрээ аавынхаа төрсөн өдрийг тэмдэглэнэ. Гадуур гарч хоол идэхгүй байх л даа. Гэхдээ гэртээ гоё хоол хийж идээд, бялуу хуваана гэж бодохоор л догдлоод байгаа.

Х /6 настай/

-Эмнэлэгт хэвтэх ямар байна?

-Муухай байна. Яагаад гэвэл эмнэлэг маш уйтгартай. Цэргийн эмнэлэгт хэвтэж байхад яг л мөсөн хонгил шиг хүйтэн өрөөнд оруулсан. Тэгээд тийм өрөөнд удвал эмнэлэг ч үгүй, эмчилгээ ч үгүй болох нь гээд эгч маань хэлээд ээж гомдол гаргасан. Тэгээд эмч намайг өөр өрөөнд оруулсан юм. Хэд хоног ээжийн утсаар л тоглож өнгөрсөн дөө. Харин энэ эмнэлэгт шилжиж ирснээс хойш миний уур маш их хүрсэн. Өрөөний маань эгч ээжид “Наад охиноо аваад яв. Унтаж байхад чанга, чанга яриад байна” гэж уурласан. Уг нь тэр эгч утсаа оролдоод л хэвтэж байсан юм. Тэгээд ээж бид хоёрыг өөр өрөө рүү яв, зайл гээд ээжийн гэдэс рүү түлхсэн. Ээж одоо найман сартай жирэмсэн. Хамгийн муухай нь ээжийг маань “Зүгээр төрөхийг чинь харна аа” гэсэн. Тэгээд би шөнө бүр нууцаар дүү маань зүгээр л байгаасай гэж залбирдаг болсон. Одоо ээж бид хоёр өөр тасагт байгаа. Хуучин өрөөнөөс хамаагүй дээр байна.

-Эмнэлгийн хоол ямар байна?

-Ээж бид хоёр “Цэргийн төв эмнэлэг”-ээс энд ирсэн. Тэнд байхад хоол нь амоксициллин цацчихсан юм шиг амттай байсан. Харин энэ эмнэлгийн каш нь гоё, будаатай шөл нь муухай.

-Эмнэлэгт хэвтэх хамгийн гоё нь юу байв?

-Чацарганатай витагрипп уух хамгийн гоё байсан. Эмч маань надад өгсөн юм.

-Хэнийг хамгийн их санаж байна?

-Одонгоо аниагаа маш их санаж байна. Одонгоо аниа маань энд нислэгийн төвийн ойрхон амьдардаг.

-Эмнэлгээс гараад хамгийн түрүүнд юу хиймээр байна?

-Миний төрсөн өдөр 1 сарын 24-нд болно. Эмнэлгээс гараад төрсөн өдрийнхөө бэлгийг хамгийн түрүүнд авна. Би 3 янзын тоглоом авах гээд харчихсан байгаа.

А /8 настай/

-Эмнэлэгт хэвтэх ямар байна?

-Би энэ эмнэлэгт ирэхээсээ өмнө нь “Цэргийн төв эмнэлэг”-т 14 хоносон. Тэнд хоол нь амтгүй байсан болохоор жоохон муухай санагдсан. Харин энэ эмнэлэгт хоол нь гоё болохоор арай дээр санагдаж байна. Бас өрөөний маань ах надтай хөзөр тоглодог. Би хөзөр тоглох дуртай.

-Хэнийг хамгийн их санаж байна?

-Эмээгээ санаж байна. Бас гэрээ. Эмээ гэрт байгаа.

-Эмнэлэгт хэвтэхийн хамгийн муухай нь юу байв?

-Хүссэнээрээ тоглож чадахгүй, жоохон тоглох гэхээр л хүмүүс уурлаад эхэлдэг нь муухай.

-Эмнэлгээс гараад хамгийн түрүүнд юу хиймээр байна?

-Гэртээ хариад зурагтаа үзмээр байна.

Хүүхдүүд угаалгын өрөө орох замдаа л нэг юм гүйж харайж авч харагдана. Аав, ээжээсээ уйдсан хүүхдүүд намайг бас явах замд хааяахан шохоорхож харна. Хөхүүл хүүхдээс авхуулаад дөнгөж хөлд орж байгаа хүүхдүүд ч харагдсан. Эмнэлэгт байх хугацаанд амтгүй хоолноос гадна цэвэр агаар томчууд бидний хамгийн том асуудал болж байсан юм. Энэ жаахан амьтдыг хараад эдэнд цэвэр агаар миний хүсэж байснаас ч илүү ямар их хэрэгтэй байсан бол доо гэж бодогдож байлаа.

Ub.life 2021.01.20

14