1 мин

Монгол Улсад шинэ төрлийн коронавирусийн халдвар бүртгэгдээгүй байна

Э.Намуун 2020.01.28

Шинэ коронавирусийн халдварын нөхцөл байдлын мэдээллийг Эрүүл мэндийн яамнаас өглөө. Өнөөдрийн 10 цагийн байдлаар өвчилсөн хүний тоо 4474-д хүрч, 106 хүн нас барж, 63 хүн эдгэрсэн байна. Бүх нас баралт БНХАУ-д бүртгэгдсэн. Халдвар авсан байж болзошгүй хүний тоо 5000 гарсан.

ЭМЯ-ны Төрийн захиргаа удирдлагын газрын дарга Б.Цогтбаатар "Монгол Улсад шинэ төрлийн коронавирусийн халдвар бүртгэгдээгүй. Нэгдүгээр сарын 9-27-ны хооронд нийт 13 хүнийг ХӨСҮТ-д тусгаарлаж шинжилгээ авсан. Тэдгээр иргэд БНХАУ-д зорчоод ирсэн, халуурсан шинж тэмдэгтэй байсан. Дөрвөн хүнээс томуугийн А хүрээний вирус илэрсэн. Архангай, Ховд аймагт сэжигтэй тохиолдол гарсан нь үгүйсгэгдсэн. Уушгины хатгалгааны улмаас нас барсан тохиолдлуудыг нягталж байна. Өмнөговь, Булган, Хэнтий аймагт халуурсан тохиолдол гарсныг шинжилж байгаа. Оношлуур өчигдөр ирж, ХӨСҮТ-ийн лавлагаа лабораторид ашиглагдаад эхэлсэн" гэлээ.

Уг халдварт өвчнөөс өөрийгөө болон, эргэн тойрны хүмүүсээ хамгаалахын тулд гараа тогтмол савандаж угааж, амны хаалт хэрэглэн өвчлөл бүртгэгдсэн улс оронд зорчихгүй байхыг зөвлөлөө.

Дашрамд дурдахад, өчигдөр орой Япон улсаас коронавиурсийг оношлох оношлуурыг хүлээн авсан билээ.