1 мин

Найз бүсгүйдээ гэрлэх санал тавихын тулд Диснейн хүүхэлдэйн киног дахин бүтээжээ

Б.Саруул 2020.01.13 26 2 1

2493

Найз залуутайгаа театрт кино үзэж суутал гол дүрүүд нь та хоёртой дэндүү адилхан санагдаад байвал яах вэ? Яг ийм явдал Стутхи Дэвид хэмээх бүсгүйд тохиолджээ.   

Найруулагч мэргэжилтэй Ли Лоуклер найз бүсгүйдээ тун өвөрмөц байдлаар гэрлэх санал тавьсан нь энэ аж. Тэрбээр 6 сарын өмнө Австралийн иллюстратор Кайла Кумбс руу мэйл бичиж, 1959 онд бүтээсэн Диснейн "Нойрсож буй гоо гүнж" хүүхэлдэйн киноны нэг хэсгийг дахин хийлгэх хүсэлтэй байгаагаа илэрхийлжээ. Лоуклер хүүхэлдэйн киноны ханхүү, гүнжийн дүрийг өөрсөдтэйгээ адилхан болгож бүтээхийг хүссэн аж. 

Хүүхэлдэйн кино бэлэн болох үед Лоуклер жижигхэн кино теарт хөлсөлж, найз нөхөд болон гэр бүлийнхнээ урьжээ. Ханхүү Филлип Аврора гүнжийг үнсэх хүртэл найз бүсгүй нь юу ч гадарлаагүй гэнэ. Стутхи Дэвид гүн нойрноос сэрж буй Аврора гүнж, түүнийг аварсан ханхүү Филлип хоёрыг хараад гайхширч суутал Лоуклер өвдөг сөгдөн түүнд гэрлэх санал тавьжээ. 

Энэхүү сэтгэл догдлуулсан гэрлэх саналын бичлэг сошиал орчинд вайрел болоод байна. Лоуклерийн YouTube хуудаснаас л гэхэд 6.2 сая хүн уг бичлэгийг үзжээ. 

Хайр сэтгэлээ илэрхийлэх өвөрмөц санааг бодож олохын тулд залуус ихээхэн цаг, сэтгэл зарцуулдаг аж. Англид амьдардаг Эди Окоро хэмээх залуу хайртай бүсгүйдээ 30 өдрийн турш 'нууцаар' гэрлэх санал тавьсан тухай өмнө нь бид мэдээлж байсан билээ. 

2018 онд продюсер, найруулагч Гленн Уайсс Эммигийн шагнал хүртсэнийхээ дараа тайзнаас найз бүсгүйдээ гэрлэх санал тавьж байсан юм. 

Эх сурвалж: BBC

Б.Саруул 2020.01.13

2493