2 мин

Найз залуугаасаа салж, ажлаа хаяад нохойтойгоо цуг аялж яваа 24 настай бүсгүй

О.Анхзаяа 2019.12.26

Өөрийн мөрөөдлөөр амьдрахад маш олон зүйл замд нь саад болж буй олон хүн байгаа байх. "Ингэх ёстой" гэх бодлоос болоод чөлөөтэй байж чадахгүй байгаа хүн бүхэнд энэхүү нийтлэлийг хүргэж байна.

Сидней Фербраче гэх 24 настай бүсгүй өөрийн нохой Эллаг дагуулан АНУ-аар тойрон аялах аялалдаа анх гарчээ. Тэр суудлын ажлаасаа хагацаж, аялж явах үедээ өөрийн хүссэн ажлыг лаптопоороо хийдэг байна. Тэр хүссэн машинаа худалдаж авахын тулд 3 ажил хийж байснаас гадна өөрийн найз залуугаасаа салаад энэхүү аялалдаа гарчээ.

"Яагаад аялах дуртай вэ гэвэл би өөр соёл, өөр хүмүүсээс үргэлж шинийг олж мэдэж, сурч авдаг. Байгаль үнэхээр үзэсгэлэнтэйгээс гадна энэ дунд өдөржин байна гэдэг тэр чигтээ бэлэг. Шинийг сурч мэдэх үүн шиг гайхалтай арга үгүй" гэж тэр ярилцлагадаа дурджээ.

"Эх орноороо аялж явахдаа би өчнөөн олон содон зүйлтэй учирсан. Бас дээрээс нь аялалд гарахад асар олон хүнд хэцүү зүйлтэй таарсан. Би осолд орж, хэдэн долоо хоногийн турш өөр газар толгой хоргодох хэрэгтэй болсон.Нохойг минь оруулахыг зөвшөөрөхгүй олон ч газартай таарсан. Бас Элла минь мэс засалд орох хэрэгтэй болоход дэргэд минь туслах хэн ч байгаагүй. Гэр бүлийнхэн минь тэр холоос надад чадахаараа л тусалсан. Гэхдээ заримдаа зүгээр л тэврэлт хэрэгтэй байдгийг ойлгосон."

Тэд цугтаа 20 гаруй мужаар аялсан байна.

Хийж буй зүйлийг нь дэмжиж, тусалдаг гэр бүл, найзуудынхаа ачаар тэр олон сөрөг зүйлээс хол байж чаддаг гэнэ. Заримдаа интернетэд түүний хүсээгүй тийм сэтгэгдлүүд байгааг тэр олж хардаг байжээ. Гэвч хүмүүс сайнаар хүлээн авч, дэмжиж байгаа нь түүнд үнэхээр таалагдсан байна.

"Аялалд гарахад асар их мөнгө шаардлагагүй. Та жаахан хүүхдүүдтэй байсан ч аялж болно. Ямар ч нөхцөл байдалд байсан та адал явдалд гарах боломжтой. Бэлтгэл ажил мэдээж цаг авах болно. Бас чадахаараа мөнгө цуглуулах хэрэгтэй болно. Гэхдээ бүх зүйлийг мөр мөрөөр нь төлөвлөх хэрэггүй. Нэгэнт замд гарсан байхад өөр юу ч хамаагүй."