Хайх зүйлээ бичнэ үү

6 мин

ОСКАРЫН ТААМАГ ба амжиж үзэх 10 кино


2021 он гарахтай зэрэгцэн Оскарын шагнал гардуулах ёслол ямар хэлбэрээр зохиогдох бол гэсэн хүлээлт үүслээ. Дөрөвдүгээр сарын 25-нд виртуалаар зохиогдох уу, эсвэл маск зүүн зай барьж Долби театрт уламжлал ёсоор болох уу гэдэг нь одоогоор тодорхойгүй байна. 

Тааварлахад бэрх олон асуулт дагуулсан Оскарын шагнал гардуулах ёслолоос өмнө амжиж үзэх 10 киног танилцуулж байна. (Энэ мэдээлэл нь спойлер агуулсан болно)

Da 5 Bloods

Спайк Лигийн найруулж, продюсерлэж, зохиолыг нь хамтран бичсэн Da 5 Bloods кино Оскарын хэд хэдэн номинацид нэр дэвших магадлалтай байна. Вьетнамын дайны үеэр хамтран тулалдаж явсан дөрвөн ахмад дайчин отрядын ахлагчийнхаа шарилыг олохын сацуу дайны үеэр нуусан алтан гулдмайгаа авахаар эргэнэ ирж буй тухай өгүүлнэ. Жүжигчин Чедвик Боузман таалал төгсөхөөсөө өмнө энэ кинонд туслах дүр бүтээжээ. ( Netflix дээр гарч байгаа)

Ma Rainey's Black Bottom

Авьяаслаг жүжигчин Хит Лежер 12 жилийн өмнө Жокерын дүрээрээ Оскарын шагнал хүртэж байв. Харамсалтай нь, тэрбээр Академийн шагнал гардуулах ёслолоос өмнө таалал төгссөн тул Оскарын шагналыг түүний гэр бүлд хүндэтгэлтэйгээр гардуулжээ. Үүнийг дурдсаны учир нь, нас барсныхаа дараа Оскарын шагнал гардсан явдал хоёр дахь удаагаа давтагдаж магадгүй юм. 

Ma Rainey's Black Bottom кино хэд хэдэн номинацид нэр дэвшихээр байна. Тухайлбал, Хар ирвэсийн дүрээр үзэгчдийн сэтгэлд хоногшсон жүжигчин Чедвик Боузман шилдэг эрэгтэй гол дүрд, Глинн Термэн шилдэг эрэгтэй туслах дүр, мөн Виола Дэвис хоёр дахь удаагаа шилдэг эмэгтэй гол дүрд, мөн шилдэг кинонд нэр дэвшинэ гэсэн таамаг гарчээ. 

Ma Rainey's Black Bottom бол Чедвик Боузманы дэлгэцэнд дүрээ мөнхөлсөн сүүлийн уран бүтээл юм. (Netflix дээр гарч байгаа)


Mank

Бүх цагийн үеийн хамгийн шилдэг бүтээл гэгддэг Citizen Kane найруулагч Орсон Веллст ердөө ганцхан Оскар авчирч байжээ. Харин энэ бүтээл хэрхэн бүтсэн тухай өгүүлэх найруулагч Дэвид Финчерийн Mank кино илүү амжилт үзүүлнэ гэж кино сонирхогчид хүлээж байна. 

Mank шилдэг найруулагч, шилдэг кино номинацид нэр дэвших магадлалтай байгаа аж. Түүнчлэн гурван жилийн өмнө Darkest Hour кинонд бүтээсэн дүрээрээ шилдэг эрэгтэй гол дүрийн шагнал хүртэж байсан Гэри Олдман энэ жил дахин тус номинацид нэр дэвшинэ гэж таамаглаж байна. Үүнээс гадна Аманда Сейфрид шилдэг эмэгтэй туслах дүр, Чарлз Дэнс шилдэг эрэгтэй туслах дүрд "сойгдож" буй. (Netflix дээр гарч байгаа)

News of the World

Жефферсон Кайл Кидд (Том Хэнкс) бол нэг хотоос нөгөө хот руу дамжин хүмүүст сонин уншиж өгөөд амьдралаа залгуулдаг Иргэний дайны ахмад дайчин. Нэгэн удаа тэрбээр нялх байхдаа уугуул иргэдэд хулгайлагдсан охинтой таарч, түүнийг гэр бүлийнхэнд нь хүргэж өгөхөөр замд гарснаар үйл явдал өрнөнө. 

Эл бүтээл Оскарын шилдэг кино, шилдэг найруулагч номинацид нэр дэвших магадлалтай байна.

Nomadland

Фэрний нөхөр нас барж, өөрөө ажлаасаа халагдаж, амьдарч байсан хот нь эдийн засгийн хямралын улмаас доройтож эзгүйрнэ. Энэ бүхний дараа тэрбээр Америкийн хөндлөн гулд туулангаа ажиллахаар шийднэ. 

Хятад гаралтай уран бүтээлч Хлоя Чао киногоо найруулж, продюсерлэж, зохиолыг нь өөрөө бичжээ. Түүний өмнөх бүтээлүүд кино шүүмжлэгчдээс өндөр үнэлэлт авч байсан юм. 

Nomadland киноны тухайд гол дүрийг бүтээсэн жүжигчин Фрэнсис Макдорманд шилдэг эмэгтэй гол дүр, Дэвид Стрэтэйрн шилдэг эрэгтэй туслах дүрд нэр дэвших магадлалтай гэжээ. Мөн Хлоя Чао шилдэг найруулагчаар шалгарч, уг шагналыг хүртсэн анхны ази эмэгтэй найруулагч болохыг үгүйсгэхгүй юм. Мөн шилдэг найруулагч номинацид нэр дэвшсэн ихэнх бүтээлүүд шилдэг кинонд давхар өрсөлддөг. 

One Night in Miami

Энэ жил хоёр ч эмэгтэй найруулагчийн бүтээл Оскарт сойгдож байна. Түүний нэг нь Режина Кингийн One Night in Miami кино юм. Малкольм Экс, Мухаммед Али, Жим Браун, Сэм Күүк нар 1964 оны хоёрдугаар сард Алигийн ялалтыг тэмдэглэхээр Майамигийн зочид буудалд уулзаж байгаагаар кино эхэлнэ. Хэдийгээр энэ үйл явдал бодит амьдрал дээр өрнөөгүй ч Режина Кингийн найруулга, кино зохиолд шүүмжлэгчид өндөр үнэлгээ өгч байна. 

Тус киноны уран бүтээлчид шилдэг эрэгтэй туслах дүр, шилдэг эрэгтэй гол дүр, шилдэг кино төрөлд тус тус нэр дэвших магадлалтай. 

Pieces of a Woman

Марта эх баригчийн тусламжтайгаар гэртээ амаржсанаар залуу хосын амьдралд эргэлт буцалтгүй том өөрчлөлт гарна.Өмнө нь Оскарын шагнал хүртэж байсан Ordinary People, Marriage Story зэрэг бүтээлүүдийн нэг адил гэр бүл, хосын харилцааны тухай өгүүлэх бүтээл. 

The Crown цувралд Маргарет гүнжийн дүрийг бүтээж хэд хэдэн шагнал хүртсэн Ванесса Кирби энэ удаа Pieces of a Woman кинонд бүтээсэн дүрээрээ Венецийн олон улсын кино наадмаас шилдэг эмэгтэй жүжигчний шагнал хүртжээ. Эл бүтээл шилдэг эмэгтэй туслах дүр, шилдэг эмэгтэй гол дүр номинацид нэр дэвшинэ гэсэн таамаглал өрнөж байна. (Нэгдүгээр сарын 7-оос Netflix-ээр цацагдана)

Promising Young Woman

Кэсси бол эцэг эхтэйгээ хамт амьдарч, кофе шопод ажилладаг эмэгтэй. Өмнө нь тэрбээр анагаахын сургуульд сурдаг байсан ч түүний найз Нина хүчирхийлэлд өртөж, хэн ч түүнд итгэхгүй байгааг харснаар сургуулиасаа гарчээ. Сүүлд Нина амиа хорлож нас барсны дараа Кэсси найзад нь итгэж, хэрэгтнийг шийтгэхийг хүсээгүй эрчүүдээс өшөө авахаар шийднэ. 

#MeToo хөдөлгөөний философийг шингээсэн уг триллер жанрын бүтээл дор хаяж нэг номинацид нэр дэвшинэ (шилдэг эмэгтэй гол дүр) гэгдэж байна.  

Soul

Сүүлийн 19 жилд 10 удаа Оскарын шилдэг анимэйшн шагналыг хүртсэн Pixar энэ жил Soul хэмээх бүтээлээрээ өрсөлдөх нь тодорхой болоод байна. Энэ бүтээлд амьдралын утга учир, хойд нас гэх чухал сэдвийг дунд сургуулийн хөгжмийн багш Жөү Гарднерын түүхээр дамжуулан харуулдаг. Soul шилдэг анимэйшн номинацид нэр дэвшихээс гадна шилдэг кинонд өрсөлдөж магадгүй байгаа юм. Хэрэв шилдэг киногоор шалгарвал энэ нь уг шагналыг авч буй Pixar-ийн гурав дахь бүтээл болох аж. 

The Trial of the Chicago 7

1968 онд Вьетнамын дайныг эсэргүүцсэн долоон иргэнийг хуйвалдаан явуулсан, Ардчилсан намын үндэсний чуулган дээр үймээн самуун дэгдээсэн гэх хэрэгт буруутган баривчилснаар киноны үйл явдал өрнөнө. 

Түүхэн үйл явдлыг харуулсан энэ киноны зохиолыг Аарон Соркин 2007 онд бичиж, Стивен Спилбергийг найруулагчаар ажиллуулах бодолтой байжээ. Гэвч 2007 онд гарсан дэлгэцийн уран бүтээлчдийн жагсаал, киноны төсөвтэй холбоотой асуудлаас болж Спилберг энэ кинонд ажиллахаас татгалзжээ. Ийнхүү хойшлогдсоор 2018 оны аравдугаар сард Соркин найруулагчаар ажиллахаар болж, кино зураг авалт эхэлсэн юм. 

The Trial of the Chicago 7 шилдэг эрэгтэй туслах дүр, шилдэг кино зохиол гэх мэт хэд хэдэн номинацид нэр дэвших магадлалтай. (Netflix дээр гарч байгаа)

Хамгийн их уншилттай
1
2021.03.29
"Бүхнийг чадагч" Ангууч буюу Б.Баттөрийн тухай 21 БАРИМТ
2
2021.04.12
Дэлхийн алдартнууд VS Монголын одууд | Тэд хэрхэн уучлал гуйдаг вэ?
3
2021.04.05
"Ододтой бүжиглэе" шоу үзэгчдийг зурагтны өмнө "уяж" буйг батлах хөгжилтэй 17 пост
холбоотой мэдээ
1
4 өдрийн өмнө
Таныг айлгаж, цочроож, балмагдуулах хамгийн АЙМШИГТАЙ 25 кино
2
2021.04.15
Хаврын цэцэгстэй хамгийн үзэсгэлэнт 16 кино
3
2021.04.15
Японы кино театрууд суудал хооронд ХАНА суулгажээ
санал болгох
1
7 цагийн өмнө
Ням гарагт Улаанбаатарт бороотой
2
7 цагийн өмнө
Ном уншдаг хүн бүрийн ойлгох 21 "хүндхэн хөгжилтэй" мэдрэмж
3
11 цагийн өмнө
Дэлхийн номын өдөр | Яг одоо хүргэлттэй ном авч болох 5 газар

Энэ мэдээнд өгөх таны сэтгэгдэл?
1
0
4
0
0
0
0
0

Сэтгэгдэл бичих (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.