Sony 'өмсдөг' агааржуулагч бүтээжээ
Жилийн өмнөөс яригдаж эхэлсэн "өмсдөг" агааржуулагч хэрэглэгчдэд хүрч эхэллээ. Sony компанийн бүтээсэн Reon Pocket хэмээх төхөөрөмж нь хүйтэн болон дулаан агаараар үлээдэг бөгөөд гар утаснаас ч хөнгөн, жижиг юм.
Хэрэглэгч үлээх температурыг гар утсаараа тохируулах эсвэл автомат удирдлага дээр тавьсан ч болох гэнэ. Автомат удирдлага нь хүний хөдөлгөөнийг мэдэрч, зохих хэмээр үлээдэг юм байна. Халуун өдөр сэрүүцүүлэх, хүйтэн өдөр дулаацуулах чадалтай Reon Pocket-ийн батарей 90 минут тасралтгүй цэнэгээ барих чадалтай бөгөөд цэнэглэхэд хоёр цагийг зарцуулдаг.
130 долларын үнэтэй уг төхөөрөмжийг тусгай зориулалтын фудволк дагалдаж ирэх ба энэ нь ардаа төхөөрөмжийг хийхэд зориулсан халаастай аж. Бүгчим, халуун цаг агаартай Хятад, Япон зэрэг улсуудад Reon Pocket-ийн эрэлт хэрэгцээ өндөр байна гэжээ.
Эх сурвалж: Digital Trends