Сурагч охины төгсөлтийн баяртаа зориулж урласан 'корона' даашинз
Спарта хотын ахлах сургуулийн сурагч Пейтон Манкерын урласан төгсөлтийн баярын даашинз сошиал медиад олны анхаарлыг татаж байна. Манкерын ээж охины оёсон даашинзны зургийг авч фэйсбүүктээ оруулсныг 254 мянган хүн шэйрлэж, 148 мянган хүн риакшин даржээ.
Скоч үйлдвэрлэгч Duct брэнд жил бүр ахлах сургуулийн төгсөлтийн баярын гоёлуудаас шилдгийг нь тодруулж, 20 мянган долларын тэтгэлэг олгодог аж. Манкер энэ уралдаанд оролцохоор нэгдүгээр сараас эхлэн даашинз урлаж эхэлсэн бөгөөд хэдэн долоо хоногийн хугацаанд нөхцөл байдал бүхэлдээ өөрчлөгдсөн нь түүнийг 'корона' даашинз урлахад хүргэжээ.
Зураг | Тайлбар |
Сурагч охин төгсөлтийн баярын үдэшлэгтээ орох боломжгүй болсон ч өрнөж буй түүхэн үйл явдлыг, өөрийнхөө мэдэрч, туулж буй бүхнийг даашинздаа тусгаж харуулахыг хүсчээ. Даашинз дээрх дүрслэлүүд бүхэлдээ цар тахлын үеийн амьдралын хэв маягийг харуулах аж. Тухайлбал, масктай хүн, онлайнаар хичээлдээ хамрагдаж буй оюутнууд, тахлын тэргүүн эгнээнд ажиллаж буй баатруудыг тэр даашинздаа дүрсэлжээ. Түүнчлэн Манкер коронавирусийн хэлбэртэй гар цүнх, гоёл чимэглэл, маск, гутал хүртэл хийсэн байна.
Зураг | Тайлбар |
Манкер "Цар тахал зөвхөн ахлах сургуулийн сурагчдад ч биш, зөвхөн АНУ-д ч биш, дэлхий нийтэд бүхэлд нь нөлөөлж байна. Тиймээс би үүнийг харуулахыг хүссэн" гэдгийг дурдаад "Одоо нөхцөл байдал хүнд байгаа ч коронавирусийн цар тахал хэзээ нэгэн цагт арилж, бүх зүйл сайхан болно. Энэ туршлага бидэнд эерэг үр дүнг ч авчирч болно шүү дээ. Миний хийсэн даашинз үүний нэг жишээ нь юм" гэжээ.
Зураг | Тайлбар |
Duct брэндийн уралдааны ялагч долоодугаар сард тодрох юм байна.
Эх сурвалж: CNN