Та өнөөдөр хүүхдэдээ хайртай гэдгээ хэлээд гарсан уу?
Хүүхдийн сэтгэл зүйчид 4-8 насны хүүхдүүдээс хайр гэж юу болох талаар бодлыг нь асуужээ. Тэдний хариулт ямар ч насанд хүрсэн хүний хариулахаас илүү ухаалаг, илүү өргөн, илүү гүн гүнзгий, утга учиртай байв. Хүүхэд хайрыг хэнээс ч илүү ойлгож мэдрэн, ажиглаж, тунгаадгийн жишээ... Бид хүүхдүүдээ хайраар дутааж буй юм биш биз? Та өнөөдөр тэдэндээ хайртай гэдгээ хэлээд ажилдаа гарсан уу?
4 настан:
Хэрэв хэн нэгэн хүн чамд хайртай бол чиний нэрийг нэг л өөрөөр дууддаг. Тэгж дуудахад нь бүх юм амар тайван байгааг чи мэдрэх болно.
5 настан:
Хайр бол охидууд ээжийнхээ гоё үнэртэй усыг түрхээд, хөвгүүд бас аавынхаа сахлын уснаас түрхээд хамтдаа гадаа гарч, бие биенийхээ гоё үнэрийг үнэртэх.
4 настан:
Хайр бол би идэж байгаа хоолноосоо бусдад харамгүй өгөх. Хариуд нь түүний хоолноос иднэ гэж хэлэхгүй байх.
8 настан:
Ээж минь аавд кофе чанаад, аягалж өгөхдөө амт нь зүгээр байгаа эсэхийг шалгаж өөрөө нэг балгадаг нь хайр юм болов уу.
4 настан:
Аав ээж чинь зөндөө их ядарсан ч гэсэн чамайг инээлгэхээ мартдаггүй бол тэр хайр.
7 настан:
Зул сарын өглөө өөрийнхөө бэлгийг задлахаа азнаж, эргэн тойрноо харахад хайр мэдрэгддэг.
6 настан:
Чи өөрийнхөө дургүй хүнтэй найзлахыг хичээж чадвал тэр бол хайр.
7 настан:
Чи хэн нэг хүнд түүний цамц нь их гоё юм аа гэж хэлэхэд тэр цамцаа өдөр болгон өмсөөд л байвал тэр бол хайр.
6 настан:
Хайр гэж хүмүүс бие биенийхээ муу талыг мэддэг ч гэсэн хамт байгаад л байхыг хэлнэ.
8 настан:
Би тайзан дээр төгөлдөр хуур тоглох гээд гарахдаа маш их сандарсан. Тэгээд намайг үзэж суугаа хүмүүс дунд аав минь байгааг олж хараад маш их тайвширч, сандрахаа больсон. Тэр л хайр байх.
6 настан:
Ээж минь намайг хамгийн их хайрладаг. Шөнө унтахад намайг үнсдэг хүн ээжээс өөр байхгүй.
7 настан:
Ээж хоол хийхдээ хамгийн амттайг нь аавд өгдөг. Тэр бол хайр.
4 настан:
Чи нохойгоо өдөржин ганцааранг нь орхисон ч гэлээ, орой ирэхэд тэр чиний нүүрийг долоож байвал тэр бол хайр.
4 настан:
Эгч маань надад бүх хуучин хувцсаа өгөөд өөрөө шинэ хувцас авахаар дэлгүүр явдаг нь хайр юм.
7 настан:
Хайр бол ээж минь аавыг жорлон дээр сууж байгааг харсан ч ямар заваан юм бэ гэж боддоггүйг хэлнэ.
8 настан:
Хэрвээ чи хэн нэг хүнд хайртай бол түүнийгээ байнга хэлж байх ёстой. Хүмүүс амархан мартдаг учраас.
4 настан:
Хэн нэг хүн гуниглаад уйлж суувал хажууд нь сууж уйлахад нь туслана гэдэг бол хайр.