15 мин

The New York Times | 2020 онд аялж үзэх 52 газар орон (Бүрэн жагсаалт)

О.Анхзаяа 2020.01.13 9 2 2

786

Та бүхэнд "The New York Times"-ийн 2020 онд аялж үзэх 52 газар орон нийтлэлийг албан ёсны эрхтэйгээр орчуулан хүргэж байна. Аялах ёстой улсуудын нэрс дунд Монгол Улс маань ч багтжээ.

1. Вашингтон

АНУ-ын нийслэл хотод шинэхэн ресторан, түүхэн театрууд, үзэж сонирхох дурсгалт газар олон бий. 100 жилийн өмнө буюу 1920 оны наймдугаар сарын 18-нд америк эмэгтэйчүүд сонгуульд саналаа өгөх эрхтэй болсноос хойш сонгууль болох жил болгонд энэ түүхэн явдлыг эргэн дурсдаг билээ. Мөн Конгрессын номын сан, Америкийн түүхийн музей, Архивын музей энэ онд олон сонирхолтой үзмэр нээж, олонд толилуулна. Сонгуулийн жил учир АНУ-ын төв болсон энэ хот амь амьдралаар дүүрэн байж, завгүй холхилдох учир зочлоход хамгийн таатай байх болно.

-Zach Montague  

2. Британийн Виржинийн арлууд

Ирма, Мариа гэх хар салхинд 2017 онд өртөж, ихээхэн хор уршиг амссан ч одоо тэр бүх үйл явдлыг ардаа орхисон гэдгээ нотлон, үзэсгэлэнт төрхөө эргүүлэн олоод байна. Олон тооны тансаг амралтын газрууд үүдээ дахин нээх гэж байгаагаас гадна тэнд үйл ажиллагаа явуулдаг газрууд орчин тойрноо илүү анхаарах болж, аялан очиход таатай нөхцөлийг бүрдүүлж байна. Хуванцар хог хаягдлыг дахин ашиглаж бүтээсэн шинэхэн байгууламж, үйлчилгээний төвүүд нээлтээ хийж, хөвдөг уушийн газар, усан онгоцны аялал гэх мэт жуулчдыг татах бүх үйлчилгээ эргэн ирж байна.

-Elaine Glusac

3. Рурренабаке, Боливи

Хамгаалалтад авсан зэрлэг онгон байгальд очиж ховор сармагчин, ягаан далайн гахай зэргийг үзэх боломжтой. Боливийн хойд хэсэгт орших энэ жижигхэн суурин бол жинхэнэ зэрлэг байгаль, ариун дагшин мэдрэмж, түүхэн дурсгалын жишээ юм. Зуу зуун хүрхрээ, төрөл бүрийн ан амьтан, жимс ногоо зэрэгтэй ойр байж, байгал эхийг илүүтэйгээр мэдрэх гэсэн хүмүүс энэ газрыг зориорой.

-Nell McShane Wulfhart

4. Гренланд

Энэ газрыг яг л Исланд шиг гэж хэлж болно. Гэхдээ илүү бага хүн зочилдог, бас илүү алслагдмал. 2020 онд энэ улс завиар зугаалах аяллын хөтөлбөрүүдэд маш их анхаарч байгаагаас гадна байгаль орчноо хамгаалах сэдэв дор эко аялал зохион байгуулж байна. Цахилгаанаар ажилладаг шинэхэн усан онгоцны аялалд хамрагдах боломжтойгоос гадна тэнд ямар ч нэг удаагийн хэрэглээний хуванцар сав, соруул, аяга, халбага сэрээ зэрэг зүйл байхгүй. 

-Ratha Tep

5. Кимберли, Австрали

Австралид зорин очих жуулчдын тоо энэ газар орчимд хамгийн бага. Тийм ч учраас зэрлэг байгальд, сатаарах зүйлгүй аялахыг хүссэн хүмүүсийн хүслийн жагсаалтад заавал багтана. Далайн эргийн хөвөөг мэдэрч, хадан хавцал дээгүүр авиран, загасчлах гээд жинхэнэ утгаараа амралтыг мэдрэх боломжтой.

-Daniel Scheffler

6. Пасо Роблес, Калифорни

Калифорни мужийн хамгийн алдартай, амттай дарснуудыг эндээс хүртэх боломжтой. Энд дор хаяж 300 гаруй дарс үйлдвэрлэгч байдгаас гадна амталгааны ресторан, аялал, үзвэр ихтэй. Тансаг зэрэглэлийн жижигхэн зочид буудлууд, дарс, олив, бяслаг бас цэлмэг тэнгэр. Усан сан болон спа газруудаар дүүрэн, хамгийн эрүүл тансаг хоолоор баялаг, жинхэнэ зуныг мэдрэх тансаг сонголт энэ байх болно.

-Danielle Pergament

7. Сицил

Этна уулаас гадна энд үзэж харах зүйл асар их. Хог хаягдалгүй эко аялал газар аваад буй энэ үед халуун орны уур амьсгалыг мэдэрч, эко аялалд нэгдэхийг хүссэн хүмүүсийн сонголт. Хуучны хот суурин, цэнхэртэн харагдах далай тэнгис, моддоор дүүрэн уул толгодоос гадна энэ оны онцлох нэг зүйл нь хоолны арга хэмжээнүүд юм. Хоол болон дарсны маш олон өдөрлөг, аялал зохион байгуулагдахаар төлөвлөгдөөд байна.

-Adam Harney Graham

8. Зальцбург, Австри 

Энэ газрыг дуу хөгжмийн өлгий гэж нэрлэхэд болно. "The Salzburg Festival" бол сонгодог хөгжмийн хамгийн том, сэтгэл хөдлөм наадмуудын нэг билээ. Моцартын төрсөн нутагт болох энэхүү наадмаар та хамгийн тансаг аялгуунуудыг сонордож, таашааж болно. Мөн автобус унаагаар л зориод очиж болох хөрш хотуудад нь кафе, гудамжны хоол, ресторанууд олон бий.

-Michael Cooper

9. Токио 

Энэ зун бүх хүний анхаарал Токиог чиглэх болно. Зуны Олимпийн үеэр жуулчдаар дүүрэх нь тодорхой болсон энэ газар бүх л соёл урлагийн арга хэмжээ ээлж дараалан болж, хоолны газрууд, музей, дурсгалт газрууд хүмүүсийг хүлээн авахдаа бэлдэнэ. Тоёосү загасны зах дээр очиж, "Flipper's"-ийн амттанг идэхээр дугаарлан зогсож, Китакоред хамгийн гоё хувцаснуудыг үзэж, Яанака гудамжаар зочлон уламжлалт ахуйг сонирхож, "Skytree" дээр очин хотыг бүхэлд нь сонирхоорой. Энд хийж болох зүйлсийн жагсаалт дуусашгүй их!

-Ingrid K.Williams 

10. Кесария, Израиль

Археологийн хамгийн гайхалтай олдворуудыг үзэж, очиж мэдрэхийг хүссэн хүмүүсийн топ сонголт. Ром, Грекийн үеийн сүр жавхлантай мэдрэмж одоо ч хадгалагдан үлдсэн тус газар хуучны хэв маягтай зочид буудал, ресторан их бий.

-Casey Hatfield-Chiotti 

Та бүхэн бусад 42 газрын тухай энэхүү слайд дээрээс гүйлгэн үзэж, сонирхоно уу.

Зураг	Тайлбар
	11. Хятадын Үндэсний парк:  Агаарын бохирдлын асуудалтай нүүр тулаад байсан Хятад улс зэрлэг байгаль, ан амьтдаа хамгаалах асуудалд ихээхэн анхаарч эхэлсэн бөгөөд энэ жилээс эхлэн байгаль орчинтой танилцах аялал улам эрчээ авна гэж үзэж байна. Хуучны тосгод, гол нуурууд болон цас тогтсон өндөр уулсыг мэдрэхийг хүсвэл Хятадыг зориорой. -Nora Walsh
	12. Лесото:  Уулын хаант улс гэгддэг Лесотогийн жижигхэн улсад зочлон очих жуулчдын тоо жил ирэх тусам нэмэгдсээр байна. Интернетээр виз авдаг болж эхэлснээр очиход бүр ч амар болсон юм. ЮНЕСКО-д бүртгэгдсэн хадны сүг зургуудыг сонирхож болохоос гадна өв уламжлалаа авч явсаар буй хүмүүсийн гэрээр зочилж үзээрэй. -Kim I.Mott
	13. Колорадо Спрингс:  Энэ оны 4-р сараас эхлээд 90 сая ам.долларын өртгөөр бүтсэн АНУ-ын Олимпийн музей нээлтээ хийхээр болсон. Мөн шинэ модерн арт музей, шилэн хана, шалтай өндөр цамхаг, цаст уул моддыг харангаа хооллож болох шинэ ресторанууд гээд олон сонирхолтой зүйл энд байна. -Kathryn O'Shea-Evans
	14. Краков, Польш:  Польшийн хоёр дахь том хот, сүм дуган, хуучны барилга, их сургууль, хөшөө, газар доогуурх хонгилуудаараа алдартай газар. Европын хамгийн бохир агаартай улс байсан ч 2019 оноос эхлээд энэ байдал өөрчлөгдөж, мод, нүүрс шатаахыг хориглох болсон юм. Хуучны цаг үеэр аялах мэт мэдрэмж авахыг хүссэн хүмүүст их таалагдана. -Peter Kujawinski
	15. Жодпур, Энэтхэг:  Эрт дээр үеэсээ л Энэтхэгийн соёл уламжлалыг хадгалсаар ирсэн энэ газар одоо шинэ үеийн технологийн дэвшлийн өөрчлөлт, нөлөөнд оржээ. Энд тансаг зочид буудал, тоглолт, ресторанууд бий. Хамгийн содон өнгө, хэв загвартай байшингууд ч бий. Делигээс шууд нислэгтэй болсон учир очиход илүү амар болжээ. -Sheila Marikar
	16. Шведийн баруун хэсэг:  Модон байшинд байрлаж, байгалийн сайханд гадаалж, зэрлэг жимс, ногоогоор хооллон, ууланд авирч, байгалиар явган зугаалахыг хүсвэл энэ газар яг тохирно. Галт тэргийн замууд танд хүссэн газраа хүрэхэд туслах болно. -Tim Neville
	17. Египет:  Египетийн Гранд музей тун удахгүй нээлтээ хийх гэж байгаа тухай та дуулсан уу? Тэрбум ам.доллараар, бүтэн хоёр арваныг дамнан барьсан уг цогцолбор Египетийг бүр ч ер бусын газар болгох болно. Эрт үеэс л аялагчдын анхаарлыг татсаар ирсэн энэ газар 2020 онд ч мөн хүмүүсийн сонирхлыг татсан хэвээр байх болно. -Seth Sherwood
	18. Ла Паз, Мексик:  Мексикийн бусад газруудыг бодвол ресортууд ихтэй, жинхэнэ утгаараа аялалд түшиглэн хөгжсөн газар. Далай тэнгисийн ертөнцтэй танилцаж, далайн эрэг дээр амарч суухад тохиромжтой. -Freda Moon
	19. Гранд Айл:  Далай тэнгисийн усны хэмжээ нэмэгдэх тусам энэ арал алга болох магадлал улам нэмэгдэж байгаа билээ. Үгүй болох магадлалтайг нь мэдэх тусам очих хүсэл улам төрөх нь гарцаагүй. Жижигхэн завиар аялж, далайн эргээр алхах боломжийг битгий алдаарай. -Christopher Hall
	20. Чау Кит, Куала Лумпур, Малайз:  Жуулчдыг бүр ч ихээр татах болсон Куала Лумпурт байрлах энэ газар бол хөл хөдөлгөөнд дарагдсан, адал явдалтай, өөрийн өнгө төрхтэй газар юм. Гудамжны хоолыг жинхэнэ утгаар мэдэрч, хамгийн том захаар зочилж, шөнийн клуб, уушийн газруудыг сонирхох боломжтой. Энэ бол ядартлаа тэнэж, зугаацаж, хөгжилдөж болох газар юм. -Sanjay Surana
	21. Евнакер, Норвеги:  Ослогоос 50 милийн зайд ийм нэгэн нам гүм суурин оршино. Гэвч энд хойд Европын хамгийн том уран баримлын парк бий. Орчин үеийн уран бүтээлчдийн шилдэг бүтээлүүд байгаагаас гадна байгалийн сайхан дунд орших учраас яг л sci-fi кинонд орсон мэт мэдрэмж авах болно. -Ingrid K.Williams
	22. Бахам:  Хэдэн зуун арал нийлж Бахамыг бүрдүүлнэ. Энэ бол өргөн уудам мэдрэмжийг авч, далайн эрэг дээр хэвтэн, усан онгоцоор зугаалах хүсэлтэй хүн бүрийн очих газар. Тансаг зэрэглэлийн ресортууд их учир жинхэнэ утгаараа амрах боломж олдоно. -Frances Robles
	23. Кампот, Камбож:  Европын хуучин суурин шиг мэдрэмж төрүүлж магадгүй энэ газар үндэсний дуу хөгжим, гар урлал, жимс жимсгэнэ олны сэтгэлийг татна. Тайланд болон Вьетнамыг зорих шинэ усан онгоцны зогсоолоос ийш хүрэхэд илүү амар болжээ. -Patrick Scott
	24. Крайстчерч, Шинэ Зеланд:  2010 онд болсон газар хөдлөлт болон 2019 оны террорист халдлагын дараагаас ч энэ газар жуулчдын дурладаг газар хэвээр л байна. Үндэсний номын сан, шинэ загварын барилга байгууламжууд, хоолны аялал, дарсны ресторанууд гээд үзэх газар олон бий. -Elaine Glusac
	25. Астур, Испани:  Хамгийн үзэсгэлэнтэй үзэмж бүхий толгод, эрэг энд л бий. Ууланд авирах, дугуйгаар зугаалах байгалийг хүсэж байвал, бас хоолны асар том соёлтой танилцмаар байвал сонгоорой. -Andrew Ferren
	26. Хайда-Гуай:  Энд та ууланд аялж буй хүмүүсээс илүүтэйгээр бүргэд шувуу нисэхийг харах болно. Хөндөгдөөгүй, яг л анхны хэвээр орших байгалийн үзэсгэлэн, өвөрмөц соёл, ид шидийн мэдрэмжийг авах боломжтой. -Arabella Bowen
	27. Остин, Техас:  Урлаг, дуу хөгжим, хоол, амар амгаланг хүссэн хүмүүст. Энэ газар бол гэр бүл, найз нөхдөөрөө амрангаа тайван сайхан цагийг өнгөрүүлэх боломж олгох классик сонголт юм. Гадаа талбайд хөгжим дуугарч, амтат хоол идэнгээ дарс шимэн суух сайхан санагдахгүй байна гэж үү? -Shannon Sims
	28. Сабах, Малайз:  Энэ газар очих хамгийн том шалтгаан бол "туслах" юм. Жил болгон асар их га газар шатаж, ан амьтан нь үгүйрсээр буй онгон зэрлэг байгалийг үзэж сонирхон, хамгаалахад нь өөрийн багахан тус нэмрийг хүргээрэй. Заан, матар, аварга загас, ховор ан амьтад энд бүгд бий. -Shalini Venugopal Bhagat
	29. Черчилл, Манитоба:  Галт тэргээр зорьж очиж болох хамгийн үзэсгэлэнтэй газар. Мөн туйлын баавгайн эх орон гэгддэг. Та туйлын туяаг харж, Канадын эелдэг зочломтгой занг мэдрээрэй. -Elaine Glusac
	30. Уганда:  Шувуудын хувьд энэ газар бол диваажин юм. Мөн "Африкийн сувд" гэх нэрээрээ алдартай. Дэлхий дээр байгаа бүх уулын сармагчны тал нь шахуу энд амьдардаг. Хүрхрээ, уулын парк, цэцэг навчны орон. -Vivian Song
	31. Парис:  Хүн бүрийн шахуу мөрөөдлийн энэ газар өнгөрсөн онд гай гамшиг амсаж, Нотр-Дам галд өртөн олон хүний сэтгэлийг өвтгөсөн. Гэвч энэ онд Парис дахин өнгө төрхөө засаж, шинэчлэл, эргэн ирэлтэд бэлэн болжээ. -Ratha Tep
	32. Нуурын дүүрэг, Англи:  Романтизмын үеийг санагдуулам, хамгийн нандин мэдрэмжийг өгч чадах үлгэрийн кино шиг л энэ газар шинэ бүтээлүүд төрмөөр. Онгод хайрлах хамгийн өвөрмөц, үзэсгэлэнтэй байгаль энд бий. -Annelise Sorensen
	33. Тажикстан:  Төв Азид орших энэ газар хүмүүсийн хамгийн бага зочилж очсон улс байж мэднэ. Тэр тусмаа шинэ содон газрыг үзэж сонирхох гэсэн хүмүүст яг тохирно. Энэ онд зочлон очих шалтгаан бол шинэ шугамын автобусууд очих газруудыг улам арвин болгож байгаагаас гадна шинэ 10 зочид буудал, Хилтон хүртэл нээлтээ хийж байна. -Daniel Scheffler
	34. Антакья, Турк:  Олон сүм дуган, музей, үзвэрийн газраар дүүрсэн эртний хот. Шинэ үзмэр, олдворуудаар дүүрэн музей нь хамгийн ихээр анхаарал татаж байгаа бөгөөд Сирийн хилтэй ойр орших энэ газар тэр чигтээ шинэ нээлтийн аялал болох болно. -Carlotta Gall
	35. Лайпциг, Герман:  Воркшоп, галерей, шөнийн клуб, ресторанаар дүүрч эхэлсэн энэ газар их хотын соёл, зугаа цэнгэлийг мэдрэх боломжтой газруудын нэг болжээ. Дэлхийн алдартай DJ, уран бүтээлчид ч эн ирэх болж, бүтээлч хүмүүсийн цугларах цэг болоод байна. -Valeriya Safronova
	36. Лима, Перу:  Энэ газрыг зорин очих шалтгаан нь ганц хоол байхад хангалттай. Маш баялаг, өвөрмөц хоолны жорууд нь тэнд удахад хүргэж мэднэ. Мөн эртний гайхамшигт олдвороор дүүрэн музей, галерей нь таны анхаарлыг татах нь гарцаагүй. -Shannon Sims
	37. Молизе, Итали:  Италийн уламжлал, хуучны хэв маягийг өөр илүү дутуу зүйлгүй мэдрэхийг хүссэн хүмүүс энэ газрыг зорих хэрэгтэй. Өмнө нь сонсож байгаагүй, Италийн иргэдийн дийлэнх нь хүртэл өөрсдөө очиж байгаагүй тийм л газар гэж мэд. -Ondine Cohane
	38. Копенхаген:  Дэлхийн хамгийн анхны "хог хаягдлыг эрчим хүчинд шилжүүлж" чадсан энэ хот тэр чигтээ л байгаль ээлтэй. Шинэ зочид буудал, үзвэр үйлчилгээний газрууд болон хүнд ээлтэй бүх зүйлийг л бий болгож чадсан энэ хотоор аялахад таатай, аюулгүй байх болно. -Adam Harney Graham
	39. Ричмонд:  Хүмүүсийн тэр болгон мэддэггүй, зочилж очдоггүй энэ газар дуу хөгжим, урлаг, хоолны соёлын томоохон төлөөлөл болж эхэллээ. Америкийн бусад хотуудаас тэр болгон олж харахгүй сонин содон зүйлсийг та эндээс харах боломжтой. -John L.Dorman
	40. Кени уул:  Африкийн хоёр дахь хамгийн том уул. Гол нь энэ уулын дээр орших цас мөс 2030 оноос өмнө хайлж алга болно гэх сэтгэл өвдөм мэдээ гарсан юм. Тиймээс бидний очиж үзэх, авирч үзэх ёстой уул бол энэ юм. Жинхэнэ экстрим аялагчдын сонголт. -Paige McClanahan
	41. Минорка, Испани:  Олон хүний хөлд дарагдаагүй эрэг, байгаль энд бий. Орчин үеийн урлагийн бүтээлүүдийг мэдэрч, жинхэнэ зуны таашаалыг ханатал амсах боломжтой газар. -Lindsey Tramuta
	42. Обераммергау, Герман:  5,400 оршин суугчтай хэдий ч энэ газар 2020 онд хагас сая жуулчин хүлээн авах төлөвтэй байна. Учир нь арван жилд ганц л тохиодог "Passion Play" энэ жил тавдугаар сарын 16-наас аравдугаар сарын 4 хүртэл тоглогдох болно. -Charu Suri
	43. Плимут, Англи:  Энэ жил тохиож буй тэмдэглэлт баяртай холбоотойгоор 100 гаруй арга хэмжээ зохиогдохоор болжээ. Урлагийн тоглолт, театр, инээдмийн жүжиг, дуу хөгжим, бүжгийн арга хэмжээ гээд соёлын өдөрлөгөөр бялхах болно. -Dave Seminara
	44. Атлантик Форест, Бразил:  Хамгийн баялаг эко-систем оршин байдаг, дэлхий даяар хайрлан хамгаалах ёстой тийм байгалийн тогтоц. Энэ газар 3,400 хот сууринг ороосон байрлалтай оршдог тул танд үзэж харах, зочлох газар барагдахгүй. -Vivian Song
	45. Бель-Иль, Франц:  "Тэнгисийн үзэсгэлэнт арал" гэх нэртэй энэ газар нэрэндээ яг л тохирсон. Буйдхан хэрнээ дэлхийн хэмжээний ресторануудтай, уран зураг шиг үзэсгэлэнтэй далайн эрэг, байгальтай. -Alexander Lobrano
	46. Валь-д’Аран, Испани:  Цас мөсний орон. Тэр дундаа эрт үеийн тосгон, байшингуудаар дүүрэн газар. Энд адал явдал хайн хийж үзэх олон зүйл бий. -Annelise Sorensen
	47. Монгол:  Асар олон жуулчид шавахаас нь өмнө ирж үзэх ёстой газар. Жил ирэх тусам жуулчдын тоо нь улам нэмэгдсээр буй энэ газар тун удахгүй шинэ нисэх онгоцны буудалтай болсноор очиход илүү амар болно. 400 гаруй аяллын компани, 300 зочид буудал, 600 амралтын газар болон жуулчны газартай энэ улсад аялал хамгийн чухал чиглэл болон хөгжсөөр байна. Морь унаж, уул хаданд авирч, хөдөөгийн амьдралыг мэдрэхээс гадна 7 сард болдог үндэсний баяр болох Наадмыг үзэж сонирхоорой.
	48. Жулианагийн сорил, Словени:  Словени бол байгаль орчиндоо хамгийн их анхаардаг улсуудын нэг юм. Тэр дундаа Жулианагийн сорил бол ууланд алхаж, бартаат замаар аялах хүсэлтэй хүн болгоны хувьд зорин очих газар юм. -Alex Crevar
	49. Аддис-Абеб, Этиоп:  Энэ газрыг 2020 оны "Дэлхийн өв соёл, аялал жуулчлалын төв" болгон зарласан. Учир нь түүхийн ховор нандин, өвөрмөц бүтээлүүдийг үзэх боломжтойгоос гадна жуулчдад таатай, сонирхолтой байх бүх зүйл бүрджээ. -Debra Kamin
	50. Транселванийн уулс, Румын:  Дэлхийн хамгийн алс хязгаар газар л оршиж баймаар тийм байгалийг эндээс мэдрэх боломжтой. Хүрхрээний доогуур сэлж, ууланд авирч, майхнаа бариад хонохыг хүсвэл энэ газар танд яг тохирно. Дэлхийд цор ганцаар мэт мэдрэмжийг авах боломжтой. -Gabriel Leigh
	51. Урбино, Итали:  Сэргэн мандалтын үеийн уран бүтээлийг бүрэн утгаар нь мэдрэх боломж. Рафаэль Сантигийн үхлийн 500 жилийн ой энэ жил тохиож буй учир уран зургийн хамгийн том цугларал энд болно. -John Henderson
	52. Мөсөн голын үндэсний парк болон Уайтфиш:  1910 онд парк анх нээгдэх үед 150 мөсөн гол байсан. Харин одоо 25 нь л үлджээ. Гэсэн хэдий ч 762 нуур, 175 уул, 200 гаруй хүрхрээ, эрүү мултлам 700 миль үзэсгэлэнт байгаль таныг хүлээж байна. -Justin Franz

 c.2020 The New York Times Company

О.Анхзаяа 2020.01.13

786