Өвөрхангай аймагт 1000 ахмад настан чууллаа
Олон улсын ахмадын өдрийг тохиолдуулан Өвөрхангай аймагт энэ сарын 15, 16-ны өдрүүдэд 1000 ахмад настны чуулга уулзалт Тарагт сумын нутагт орших "Өгөөмөр" сувилалд зохион байгуулагдав. Чуулганд Өвөрхангай аймгийн өнцөг булан бүрт ажиллаж, амьдарч буй 11 мянга гаруй ахмад настныг төлөөлж 1000 ахмад настан оролцлоо.
Чуулганаар ахмад настнууд руу чиглэсэн төр засаг, аймаг, орон нутгийн бодлого, үйл ажиллагаа түүний хэрэгжилтийн талаар хэлэлцэж, тэдний санал бодлыг сонссон юм.
Ахмад настны нийгмийн хамгаалал, төрөөс ахмад настны талаар авч хэрэгжүүлж буй бодлого шийдвэрийг орон нутагт хэрэгжүүлэх, ахмадын туулсан амьдрал, хөдөлмөрлөсөн арвин баялаг туршлагыг залуу хойч үед түгээн дэлгэрүүлэх, тэдний мэдлэг чадавхийг залуучуудад өвлүүлэн үлдээхэд чуулганы зорилго оршиж байна.
Энэ үеэр ахмадууд өөрсдийн хийсэн бүтээлээрээ үзэсгэлэн гаргаж, урлаг, спортын тэмцээн уралдаанд хүч сорьж, амьдралын арвин туршлагаасаа харилцан солилцлоо.