Өвөрхангай аймагт коронавирусийн сэжигтэй нэг хүнийг тусгаарлажээ
Иймд ард, иргэд та бүхэн олноороо нэг дор цугларч нягтрал үүсгэхгүй байхыг анхааруулж байна
Өнөөдөр буюу хоёрдугаар сарын 8-ны өдөр Өвөрхангай аймгийн Бүсийн оношилгоо эмчилгээний төвд шинэ төрлийн коронавирусийн сэжигтэй нэг хүнийг тусгаарласныг Эрүүл мэндийн яамнаас мэдэгдлээ. Энэ хүн нь нэгдүгээр сарын 30-нд Замын-Үүд боомтоор Эрээн хотоор дайрч Шилийн гол аймгаас ирсэн байна. Өвчтөний биеийн байдал нь дунд зэрэг халуурч, ханиалгах шинж тэмдэгтэй байна.
Тусгаарлагдсан иргэн нь өнгөрсөн шөнө 10 гаруй хүнтэй нэг гэрт хамт Цагаан сарын бууз хийсэн. Одоогоор тэдгээр хүмүүс буюу хавьталын 10 гаруй хүнд тандалт судалгаа хийж байна. Иймд ард, иргэд та бүхэн олноороо нэг дор цугларч нягтрал үүсгэхгүй байхыг анхааруулж байна гэж Эрүүл мэндийн яамнаас мэдээллээ.