WPY: Үзэгчдийн таашаалд хамгийн их хүрсэн зураг
Лондоны метрогоор зорчиж байсан хүн бүр л тавцан, төмөр замын дагуу гүйлдэх хулгануудыг харж байсан болов уу. Сэм Роули мэрэгч амьтдын нууцлаг ертөнцийг гэрэл зурагт буулгахын тулд метроны туннельд долоо хоногийн турш "отолт" хийжээ. Тэвчээртэй хүлээсний эцэст зорчигчийн унагасан хоолны хэлтэрхийг өрсөж идэхээр тулалдаж буй хоёр хулгана Сэмийн хараанд өртсөн нь энэ аж.
Уг зураг LUMIX зэрлэг ан амьтдын гэрэл зургийн уралдааны (WPY) "People's Choice Awards" буюу үзэгчдийн таашаалд хамгийн их хүрсэн гэрэл зургаар шалгарчээ. Нийтдээ 28 мянган хүн энэ зурагт саналаа өгсөн байна.
Сэм Роули ВВС-ийн байгалийн түүхийн кино бүтээх хэлтэст судлаачаар ажилладаг аж. Тэрбээр "Метроны хоолойд амьдардаг хулгануудыг аваад үзье л дээ. Харанхуй хонгилд төрсөн эдгээр мэрэгч амьтад амьдралынхаа турш нэг ч удаа нарны гэрэл үздэггүй. Бүүдгэр хонгилоор хэдэн сар, сайндаа л нэг, хоёр жил гүйж яваад үхнэ гэдэг нэг бодлын тун өрөвдөлтэй юм. Газар дор маш олон хулгана амьдарч байгаа ч хангалттай хоол хүнс байхгүй тул өчүүхэн жижиг хоолны үйрмэгийн төлөө тэмцэхээс өөр аргагүй байдаг" гэж ярьжээ.
Үзэгчдээс өндөр үнэлэлт авсан зарим гэрэл зургийг хүргэж байна.
Эх сурвалж: BBC