4 мин

Яруу үгсээр дүүрэн "Poetry night" эвентэд ирэх зочин яруу найрагчдын шүлгүүд

О.Анхзаяа 2019.10.14

UB LIFE сайт, Fat Cat Jazz Club хамтран зохион байгуулдаг "Poetry Night at Fat Cat" эвент өнөөдөр буюу аравдугаар сарын 14-ний 19:30-д Fat Cat жазз клубт болох гэж байна. Тус арга хэмжээнд хүрэлцэн ирснээр та бүхэн нэгэн оройг дуу хөгжим, шүлэг яруу найрагтай цуг өнгөрүүлэх боломжтой бөгөөд ямар ч ТАКСГҮЙ гэдгийг дуулгахад таатай байна.

Энэ өдөр бид өөрсдийн бүтээлийг толилуулах залуу яруу найрагчдыг та бүхэнд танилцуулна. Бас олны дунд уран бүтээлээрээ танигдаж, хүндэтгэл хүлээж чадсан яруу найрагчдыг зочноор урьсан юм.

Өмнөх эвентүүдээр олон алдартай найрагчид ирж байснаас:

Өнөөдрийн эвентийн зочдыг та бүхэндээ танилцуулъя!

Зочин #1

Өөрийн шүлэг яруу найргуудаас гадна орчуулгын бүтээлүүдээрээ олонд танигдсан Дашийн Оюунчимэг энэ удаагийн арга хэмжээний хүндэт зочин болсныг дуулгахад таатай байна.

“Харанхуйн дуулал” (1999) шүлгийн түүвэр, “Гэсгээгдэгсэд” (2001) тууж, “Очирт уулын бичиглэл” (2003) шүлгийн түүвэр, “Тэнгэрийн цаг болоогүй” (2006) тууж нь тус тус хэвлэгдсэн. Шүлэг зохиолууд нь хятад, солонгос хэлнээ орчуулагдаж “Азийн яруу найраг” гэх мэт сэтгүүлд хэвлэгдэж байв.

Чиний сэтгэл хүрдэггүй тэр хүнийг
Чамд дандаа гомдоллон усан нүдэлдэг тэр хүнийг
"Чи надад хайртай юу?" улиглан гуйдаг тэр хүнийг
Би таньдаг ч байж болох юм

Эрх гөлөг шиг энгэрт чинь асахдаа хайрладаг ч юм уу, мэдэхгүй.
Эргэж харалгүй өнцөг тойртол чинь харуулддаг ч юм уу, мэдэхгүй.
"Эцсийн удаа" нулимстай эргэх нь нээрэн ч байдаг уу, мэдэхгүй.
Энхрий янаг чинь байгаагүйнхээ төлөө баярладаг ч юм уу, мэдэхгүй.

Харин би
Ганцыг л мэднэ
Хөөрхий тэр чиний өмнө
Өөрөөсөө илүү байх гэж
Өчнөөн их мэрийснийг л
Мэднэ.

Зочин #2

Манай шүлгийн үдшийн эхний зочин яруу найрагч Д.Дамдинжавын уран бүтээлээс та бүхэндээ хүргэж байна. Гол тоглогч номоороо уншигчдын танил болсон тэрбээр "Дотоод тэнгэр" яруу найргийн номоо мөн гаргаж байсан юм. 10 сарын 14-нд эвентээрээ уулзацгаая!

Толгод намхан байх тусмаа
Уул болох хүсэл нь урт насална.

Уул сүлсэн будан дунд шаазгай шагшаад эхлэхээр
Удган моддын үндсэнд хойтон хаврын нахиа дуншиж байгаа нь сонсогдоно.

Нэлэнхүй тэнгэр нүүгэлтсээр хага үсэрч
Хэлтэрхий бүр нь нуур болно
Тэнгэр тэгээд эцэстээ
Тэр чигээрээ газар болно.

Зулзган мод өвгөрлөө гэж салхиар уймарч
Зуун бадаг шүлгийг навчаар бичиж хөл дор минь дэвслээ

Бэх мэт харамсал энгэр сараачивч
Бийр мэтийг түүнд дүрж дурсамж урлана
Зүү мэт хонзон зүрх хатгавч
Утас мэтийг түүнд сүвлэн хайр урлана.

Атаа хорслын нүд олж харахааргүй алс
Алдар хийрхэл хоёрын зэв онохооргүй гүн
Амраг минь ирдэг ганц зөрөгтэй
Аав минь зэмлэдэг ганц зүүдтэй
Анир гүмхэн аж төрнө.

Хамгийн сүүлчийн борооноос цуваа надад үлдээгээд
Хорвоогийн хамаг цэцгийг хамаад явчихсан хагацал мөн үү

Чамайг явахад бороо ороод, норсон өвс хаана чинь шүргэсэн бэ?
Тэгвэл ядаж би, тэр зун ургасан өв бүрээс үнэрийг чинь асуухсан
Чамайг явахад цас хунгарлаад, даарсан тэнгэр аль хацрыг чинь хайрсан бэ?
Тэгвэл ядаж би, тэр өвөл хөлдсөн тэнгэрээс дулааныг чинь олохсон

Хүрэл уулс мэт шувууд сүүдрээрээ дайрч өнгөрөхдөө
Хүүгийнх нь зүрхэнд нүдээ гээснийг ижий минь бүү үзээсэй

Үлгэр зохиож, шүлэг хэлж өгье би чамд
Хүмүүс зүхний хэлийг сураад
Хорвоод хайрын цэцэгс тариг ээ

Зочин #3

Манай яруу найргийн үдшийн гурав дахь зочин бол Т.Нипонь. Түүний "Эмзэг" гэх ном 2013 онд хэвлэгдэн гарсан бөгөөд энэ үдэш түүний дарс мэт бүтээлүүдийг шимтэн сонсож, таалан сонордоцгооё.

Үл таних аялгуу үлбэгэрхэн дуулдана
Үүлний цаана л энэ аялгуу чангаар эгшиглэх учиртай
Үг хэлэх минь хүртэл мэдэхгүй нот мэт гонгиноно,
Үгүй. Чи биш би л нөгчсөн байх учиртай.
Үс чинь үнсэн саарал болсоор бутарч хийсэхийг
Үерлэн цэлэлзэх нүдэндээ би үзсэн
“Үнэ цэнэ надад байсангүй ээ” гэж чи хашгираад
Үймж шуугисан шувуудын цуваанд ороод нисчихсэн.
Үгүй. Энэ зүүд ч биш юу ч биш
Үнэн шүү, чамайг улаан шувуу байсныг тэгэхэд би мэдсэн.
Үхсэн хүнийх шиг нүдээр чи над руу нэг харсан
Үхэж буйг минь тэнд л чи анзаарсан уу
Үл ялиг тонгойх шиг болоод, нүд чинь гунигаар дүүрсэн
Үг хэлэхийн чөлөөгүй чи үүлний хээнд уусчихсан.

Үлгэр мэт ийм зохиомол хагацалыг би
Үзэхгүй гэхдээ нүдээ тас аньчихаад
Үүрдийн нойрондоо чамайг би үзсээр
Үзсээр байгаад сэрэхгүй байсан
Үйлт энэ учралаа би өндөг шигээ дарсаар
Үнэнээс айгаад би сэрэх тухай ч бодоогүй ээ.