1 мин

Залуучуудын ногоон наадмын спортын цогцолбор ирэх онд ашиглалтад орно

Э.Намуун 2020.09.22

2021 онд манай оронд Олон Улсын Залуучуудын Ногоон наадмыг хийх спортын цогцолборын барилгын гүйцэтгэл хийгдэж байна. Нийслэлийн өмчит Улаанбаатар спорт менежмент компанийн хариуцан гүйцэтгэж буй тус “Спортын бэлтгэлийн төв” барих, наадмын зохион байгуулалтын үйл ажиллагааны зардалд зориулж улсын төсөвт нийт 9,6 тэрбум төгрөгийн санхүүжилт тусгажээ. 

Одоогоор дэлхийн стандартад нийцсэн хөл бөмбөгийн талбай бүрэн баригдаж дууссан. Усан бассейн, хоккейн талбай барих ажил өрнөж байна. Эдгээрийг хувийн хэвшлийн хөрөнгө оруулалтаар гүйцэтгэж байгаа ажээ. Нийт 1000 гаруй үзэгчийн суудалтай, тэмцээнд оролцогч багууд тус бүр хувцас солих өрөөтэй, ногоон зүлгэн үзвэрийн шаталсан талбай баригдах зэрэг орчин үеийн загвар шийдлээр цогцолборын зураг төслийг боловсруулж гүйцэтгэж байна. 

Залуучуудын ногоон наадмын спортын цогцолбор нийт 10000 м3 талбайтай бөгөөд олон улсын залуучуудын ногоон наадам 18 байршилд зохион байгуулагдах юм.

Монгол Улсын Ерөнхий сайд У.Хүрэлсүх хэлэхдээ, анх удаа төр хувийн хэвшлийн түншлэлийн  зарчмаар “Олон Улсын Залуучуудын Ногоон наадам” зохион байгуулах цогц спортын талбай барьж төслийг ажмилттай хэрэгжүүлж байгааг харж байгаадаа баяртай байна. Тулгамдсан асуудал гарвал шийдвэрлэхэд Засгийн газраас дэмжлэг үзүүлж ажиллана гэлээ.

Э.Намуун 2020.09.22