Дэлхийн томоохон хэвлэлүүдийн нэг “The Guardian” сониноос жил бүр дэлхийн улс орнуудын дуу хөгжмөөс сорчлон олон улсын шилдэг 10 цомгийн жагсаалт гаргадаг билээ. Хөгжмийн ертөнцөд нэр хүндтэй дээрх жагсаалтын энэ оны шилдэг 10 цомгийн 10 дугаарт дуучин Энжигийн Герман улсын бөмбөрчин Саймон Попптой хамтарсан “Nant“ нэртэй цомог нэрлэгджээ.
Тус хэвлэлд “Nant“ цомгийн талаар “Монгол дуучин Энжигийн Германы жазз бөмбөрчин Саймон Попптой хамтарсан энэхүү уран бүтээл хоолойн цар хүрээ, дуу хоолойгоо хэрхэн удирдахын төгс жишээ болжээ. Уянгалаг аялгуугаар дүүрэн Энжигийн сонирхолтой дуу хоолой цомгийн “Akin” дууны хурц амьсгал бүхий хэмнэлээс эхлээд “Cathedral” дууны санаа, уран яруу байдал, мөн “Ybbs” дууны амьд, цоглог хэмнэл хүртэл бүхнийг гайхалтайгаар урлажээ. Харин бөмбөрчин Попп өөрийн өнгө аясыг шингээсэн өвөрмөц хөгжмийн хэмнэлээрээ хоршин хамтарч чадсан байна. Зөвхөн хоёрхон хөгжмийн зэмсгээс гарах гайхамшигтай өргөн хүрээ бүхий энэхүү бүтээлч дуу нь таны мэдрэмж, уур амьсгалыг өөр түвшинд аваачих болно."
Мөн дуучин бүсгүйн өнгөрсөн онд цацагдсан “Ulaan“ цомог 2023 оны дээрх жагсаалтын 3 дугаар байрт бичигдэж байсан билээ.
“The Guardian” агентлагийн 2024 оны олон улсын шилдэг 10 цомог жагсаалтад багтсан бусад цомгууд:
9. DJ Love – Budots World (Reloaded)
8. Ganavya – Daughter of a Temple
7. Malcolm Jiyane Tree-O – True Story
6. Arooj Aftab – Night Reign
5. Bizhiki – Unbound
4. Lord Spikeheart – The Adept
3. Fabiano do Nascimento and Sam Gendel – The Room
2. Milton Nascimento and Esperanza Spalding – Milton + Esperanza
1. Nusrat Fateh Ali Khan and Party – Chain of Light
