1 мин

Нүүрний будгийг амьтад дээр туршихын эсрэг #SaveRalph хөдөлгөөн өрнөж байна

Г.Сүрэн 2021.04.21 18 6 4

12

Гоо сайхны бүтээгдэхүүнийг үйлдвэрлэхээс өмнө лабораторийн орчинд туулайд туршин, харгис хэрцгий хандаж буй талаар өгүүлэх "Save Ralph" нэртэй богино хэмжээний анимейшн бүтээл цацагдлаа. АНУ-ын найруулагч Спенсер Суссерийн бүтээж, жүжигчин Зак Эфроны дуу оруулсан уг бүтээлээс улбаалан нүүрний будаг, гоо сайхны бүтээгдэхүүн үйлдвэрлэхийн төлөө олон мянган туулай, яст мэлхий, сармагчин гэх мэт амьтдад харгис хэрцгий хандан, тамлан зовоохын эсрэг #SaveRalph цахим хөдөлгөөн өрнөж эхэлжээ. 

Жил бүр дэлхий даяар 500 мянга гаруй амьтан зөвхөн гоо сайхны бүтээгдэхүүний туршилтын улмаас гэмтэж бэртэн, аймшигтай тарчлал амсдаг байна. Төрөл бүрийн гоо сайхны бүтээгдэхүүнийг хүний биед сөрөг нөлөөгүйг тогтоохын тулд амьтдад туршиж, нүд рүү нь цацах, биед нь шахах гэх мэтчилэн "туршилтын туулай" болгож амьдаар нь зовоосоор байна. 

Европын Холбоо 2009 онд гоо сайхны бүтээгдэхүүнийг амьтад дээр туршихыг хориглосон бол АНУ-ын Калифорни, Иллинойс, Невада мужуудад хориглосон ч бусад мужуудад хүлээн зөвшөөрсөн хэвээр байна. 

Дэлхий нийтээр #SaveRalph хаштагийг ашиглан, амьтдад ийнхүү харгис хэрцгий хандахын эсрэг хөдөлгөөн өрнүүлж эхэлжээ. 

Та өөрийн хэрэглэдэг гоо сайхны бүтээгдэхүүнээ амьтан дээр туршилт хийдэг эсэхийг ЭНЭ сайтаас шалгах боломжтой. Мөн сав баглаа боодол дээрээ амьтан дээр туршаагүй, амьтан тамлаагүй тухай #CrueltyFree #NotTestedOnAnimals гэсэн бичигтэй гоо сайхны бүтээгдэхүүнүүд авч хэрэглэхийг зөвлөж байна. 

Монгол хэлээр үзэхийг хүсвэл ЭНЭ хуудсаас үзээрэй.

Г.Сүрэн 2021.04.21

12