Үндэсний их баяр наадмыг нэг жилээр хойшлууллаа
Засгийн газрын ээлжит бус хуралдаанаас гарсан шийдвэрийг Ерөнхий сайдын Хэвлэлийн төлөөлөгч Ч.Болортуяа танилцуулж байна.
"Засгийн газрын ээлжит бус хуралдаан хуралдаанаас гарсан голлох шийдвэрийг танилцуулъя. Хуралдаанаар энэ жилийн Үндэсний их баяр наадмыг нэг жилээр хойшлуулах шийдвэр гаргалаа. Эрүүл мэндийн яам болон УОК-ын дэргэдэх эрдэмтдийн зөвлөлөөс гаргасан дүгнэлтээр наадам зохион байгуулбал 12 мянган хүний бөөгнөрөл үүсэх эрсдэлтэй байна. Улмаар 3000 орчим хүн халдвар авах магадлалтай байна гэсэн тооцооллыг танилцуулсан. Иймд УОК-оос өчигдөр наадмыг цуцлах эсвэл хойшлуулах эсвэл санал гаргасан бөгөөд Засгийн газар үүнийг дэмжиж энэ жилийн наадмыг нэг жилээр хойшлуулж байна. Баяр наадмыг хойшлуулахтай холбоотой хэмнэгдсэн зардлыг эрүүл мэндийн салбарт зарцуулна" гэлээ.
Энэ шийдвэр нийслэл төдийгүй орон нутагт хамаатай гэдгийг тэрбээр нэмж хэллээ.
Түүнчлэн цар тахлын нөхцөл байдалтай холбоотойгоор Алтанбулаг боомтоор зорчигч тээврийн урсгалыг долоодугаар сарын 7-31-нийг хүртэл түр зогсоох шийдвэр гаргажээ.