2 мин

Хулгайлагдсан хүүгээ хайж 500 мянган км давхисан эр 24 жилийн дараа олжээ

О.Анхзаяа 2021.07.16 2

Үнэхээр сэтгэл догдлуулж, хамар шархируулсан нэгэн мэдээг хүргэе. Гуо Гантан гэх залуугийн 2 нас гарантай бяцхан хүү 1997 онд гэрийнхээ гадаа тоглож байгаад хулгайлагдсан хэрэг гарчээ. 

51 настай Гуо Хятадыг тэр чигт нь самнан, хүү Гуо Шинжэнээ хайж мотоциклоор 480,000 гаруй км аялсан бөгөөд хүүгээ эргэн олно гэх итгэлээ ганц ч хором алдаагүй байна. Эрлийнхээ үеэр тэр осолд орж ясаа хугалан, замын олон ч хулгайчтай таарч, дээрэмдүүлж, хүнд бэрх зүйлтэй өчнөөн нүүр тулжээ. 

Цагдаа нар ч мөн хэргийг орхилгүй Шинжэнийг хайсаар ДНХ-гийн тусламжтайгаар 26 нас хүрсэн эрийг 24 жилийн өмнө хулгайлагдсан хүү мөн болохыг тогтоожээ. Багад нь түүнийг хулгайлсан хэрэгт холбоотой хоёр хүнийг баривчилсан бөгөөд тэд мөнгө олохын төлөө ийм үйлдэл хийснээ хүлээжээ. Хүү анх алга болсон тэр нутаг дэвсгэртээ л амьдарсаар ирсэн байна.

Түүний эцэг BBC-Д өгсөн ярилцлагадаа "Хүү минь одоо олдсон болохоор бүх зүйл эргээд аз жаргалтай, бүрэн бүтэн болж эхэлж байна. Энэ өдөр миний хувьд хамгийн чухал өдөр. Хүү минь олдлоо. Ирээдүй аз жаргал, итгэлээр дүүрэн байна. Бурхан бидэнд үнэхээр энэрэнгүй хандлаа" хэмээжээ. Ёстой хайр хүрмээр мундаг эцэг!

Хүүхдээ эрж хайх эцгийн цөхөршгүй сэтгэлийн хат, итгэл найдварын түүхээс санаа авч 2015 онд "Lost and Love" гэх кино хүртэл гарч байлаа. 

Яг л хүүгээ хайн мотоциклоор эцэс төгсгөлгүй давхих эцгийн эрэл хайгуулыг үнэхээр сэтгэл хөдөгөм харуулсан кино байдаг.

Тус киноны гол дүрийн жүжигчин Энди Лау энэ явдалд асар их сэтгэл хөдөлж, хүүгээ эргэн олсонд нь туйлын баяртай байгаагаа хуваалцсан бөгөөд хүүхдийн хулгай, хүний наймаатай бүгд тэмцэхийг уриалжээ.

Гуо Гантан хамгийн гайхалтай нь хүүгээ эрж хайж явахдаа хүний наймаанаас болж үр хүүхдээ алдсан хүмүүстэй ххолбоо тогтоон, байгууллагад элсэн орсон бөгөөд дор хаяж 7 гэр бүлийг үр хүүхэдтэй нь уулзаж, эргэн олоход тусалсан байна.

Хятадад хүний наймаа, хулгай хэдэн арван жилийн турш маш хүнд асуудал байсаар ирсэн. 2015 оны судалгаагаар гэхэд жил болгон 20,000 хүүхэд хулгайлагдсан тооцоо гарч байжээ. Маш олон хүүхэд бусдад үрчлэгдэж эсвэл эд эрхтний наймаа, боолчлолд ашиглагддаг гэх аймшигтай баримт бий. Үр хүүхдүүдээ анхаарцгаая.   

О.Анхзаяа 2021.07.16