2 мин

Long Covid | Эдгэрсэн хүмүүст 203 төрлийн шинж тэмдэг урт хугацаанд илэрчээ

Б.Уранзаяа 2021.07.20

Дэлхий даяар тархсан коронавирус хүний биеийн онцлог, дархлааны системээс шалтгаалан янз бүрээр нөлөөлж буйг бид мэдэх билээ. Хууч өвчин, насны онцлогоос үүдэн хүнд, хөнгөн тусахаас гадна эдгэрсний дараа бие хэвийн байдалдаа эргэн орох хүртэл олон янзын шинж тэмдгүүд урт хугацаанд үргэлжилж байгаа нь ковидын хамгийн хортой үр нөлөө юм. Тэгвэл олон улсын эрдэмтэд хамтран коронавирусийн урт хугацааны нөлөөний талаар 56 орны 3762 өвчтөн дээр явуулсан анхны бүрэн хэмжээний судалгааны үр дүнг хүргэж байна.

"Лансэт" эрүүл мэндийн сэтгүүлд хэвлэгдсэн дээрх судалгааны дагуу коронавирус нь хүний биеийн 10 төрлийн эрхтэн тогтолцоонд нөлөөлж, 203 төрлийн шинж тэмдэг үүсгэж байна гэжээ. Эдгээр шинж тэмдгүүдийн гуравны нэг нь гэхэд дор хаяж зургаан сарын турш үргэлжлэх хандлагатай байгаа ажээ.

Судалгааны багийн ахлагч, Лондонгийн Их Сургуулийн тархи судлаач эрдэмтэн Афина Акрами хэлэхдээ, одоогоор Их Британид ковидын дараах амьсгалын замыг нөхөн сэргээх эмчилгээнд онцгой анхаарч байгаа нь ихэнх хүмүүст амьсгал давчдах шинж тэмдэг илэрч байгаатай холбоотой бөгөөд өөр олон асуудлууд ч үүсэж байна гэжээ. Тэрбээр эдгээр шинж тэмдгүүдийг онцгой анхааран илүү цогц байдлаар шийдэх шаардлагатай байгааг мөн дурджээ. Зарим тохиолдолд коронавирусээр өвчлөөд эдгэснээс 16 сарын дараа ч шинж тэмдгүүд илэрсээр байгаа гэжээ.