Монголын 3х3 сагсан бөмбөгийн шигшээ баг Францын багт 22:18 харьцаагаар тун ойрхон ялагдлаа
Олимпын наадамд өрсөлдөж буй 3x3 сагсан бөмбөгийн эмэгтэй шигшээ баг өнөөдөр 6 дахь тоглолтоо Францын шигшээ багтай хийж 22:18 харьцаагаар тун ойрхон ялагдлаа. Тоглолтын туршид онооны харьцаа тун ойрхон явсан бөгөөд тоглолт дуусахаас нэг минутын өмнө л хоёр баг тус бүр 18:18 оноогоор тэнцээд байв.
Францын шигшээ багийн алдааны тоо долоод хүрч манай багийн тамирчин М. Цэрэнлхам болон Э. Чимэддолгор нар чөлөөт шидэлтийг амжилттай гүйцэтгэж багтаа 4 оноо авсан билээ. Тоглолтын хугацаа дуусах дөхөхөд хоёр багийн өрсөлдөөн ширүүсч манай багийн тамирчин Б. Солонго хөнгөн бэртэл авсан нь тоглолтын хувь заяанд ихээр нөлөөлөв.
Өмнөх тоглолтуудын туршид Б. Солонго нь оноо авалтаараа багаа тэргүүлж байсан бол энэ удаад оноо авч чадсангүй. Ийнхүү манай шигшээ багийн тамирчин М. Цэрэнлхам болон О. Хулан нар тус бүр 7 оноо авч, хамгийн эхний тоглолтоос бэртэл аваад байсан Э. Чимэддолгор 4 оноо авснаар тоглолт өндөрлөлөө.
Зураг | Тайлбар |