Гадаа талбайн машинтай кино театр ажиллаж эхэллээ
Цар тахлын энэ цаг үед бид кино театрт кино үзэж чадалгүй удаан хугацааг өнгөрүүлээд байна. Том дэлгэцээр кино үзэх юмсан гэж бодож явсан маш олон хүнд харин нэгэн мэдээ дуулгах гэсэн юм.
Монголд өмнө нь ганц хоёр удаа л зохиогдоод болж байсан гадаа талбайн кино театр тэр тусмаа машинтай кино театр нээлтээ хийлээ.
Үнийн хувьд нээлтээ хийгээгүй кино 25 мянга, нээлтээ хийсэн кино 20 мянган төгрөг.
Харин байршлын хувьд Төв цэнгэлдэх хүрээлэн гэнэ.
Өнөөдөр 21:00 цагаас "Oldboy" (2003) кино гарах бөгөөд тасалбарууд хэдийнээ дуусчээ. Мөн өдөр болгон өөр өөр кино гарах юм байна.
"Galaxy Car Cinema"-г үүсгэн байгуулагч О.Ванчинсүрэн, Т.Тайван нар уг санаагаа хоорондоо ярилцаж байгаад аль аль нь хийх хүсэлтэй гэдгээ олж мэдсэн байна.
О.Ванчинсүрэн:
"Нэг удаагийн үзвэрт 50 машин орох боломжтой. Яваандаа олон машин орох боломжтой болно. Мөн машинд дээд тал нь 4 хүн байх юм. Халдвар хамгааллын дэглэм талаасаа энэ нь хамгийн зөв шийдвэр. Манай киноны дуу хөгжим нь фм-ээр дамжиж хүрэх болохоор мотоцикл, дугуйтай болон махсингүй хүмүүс үзэхэд бэрхшээлтэй гэдэг үүднээс зөвхөн машин оруулж байгаа. Би өмнө нь машины авто зогсоолд менежер хийдэг байсан. Монголд ийм юм байдаггүй болохоор оруулж ирэх юмсан гэж хүссэн. Тэгээд найзтайгаа яриад үзтэл бид хоёр хоёулаа ийм газар нээх хүсэлтэйгээ мэдсэн юм." хэмээлээ.