“Бурхны хүү”-г тольдоорой
Зүүд шиг амьдрал, домгийн уран сэтгэмжээр аялуулах “Бурхны хүү” контемпорари үзэсгэлэн ирэх сарын 2-нд нээлтээ хийнэ.
Монголын Уран зургийн галлерейд дэлгэгдэх үзэсгэлэн арванхоёрдугаар сарын 2-8-нд үргэлжлэх бөгөөд уг үзэсгэлэн нь уран бүтээлч Ж.Анунарангийн 10 дахь бие даасан үзэсгэлэн аж.
Гэрэл зураг болон уран зураг, дуу хөгжмийг нэг дор цогцлоосон үзэсгэлэнд Өвөрмонголын саундартист “Horse Радио” хамтлагийн хөгжмийн зохиолч, дуучин Ц.Баяндалай хамтарч буй.
Тус үзэсгэлэнгийн куратороор ажилласан урлаг судлаач Ж.Ариунаа “Уран бүтээлчийн чин сэтгэлээсээ бүтээсэн зүүд шиг энэ амьдрал хийгээд, шидэт домог шиг уран сэтгэмжийн ертөнц хоорондын уулзвар дээр орших төсөөлөлд үзэгч та саатна” хэмээн тус үзэсгэлэнг тодорхойлжээ.
Бодит амьдралд суурилсан гэрэл зургуудыг баримт болгож, үүн дээрээ танка зургийн элемэнтүүдийг хослуулсан үзэсгэлэнгээрээ Ж.Анунаран төрөх, үхэх болоод амьдралын тухай өгүүлэхийг зорьжээ.