Монголын футзалын шигшээ баг 6:0-ээр БНСУ-ын шигшээ багт хожигдлоо
Азийн хөлбөмбөгийн холбооны футзалын Цомын тэмцээний урьдчилсан шатны Зүүн бүсийн тоглолтууд энэ сарын 17-ний өдөр Малайзын "Панасоник" спорт комплекст эхэлсэн билээ. Монголын футзалын шигшээ баг өчигдөр хоёр дахь тоглолтоо БНСУ-ын шигшээ багтай хийж, үндсэн цагт 6:0 гэсэн үр дүнгээр хожигдов. Урьдчилсан шатны хүрээнд Зүүн Азийн бүсийн таван баг хоорондоо өрсөлдөж хэсгийнхээ эхний гурван байрт шалгарсан багууд есдүгээр сард Кувейт улсад явагдах шигшээ шатанд өрсөлдөх эрхээ авах юм. Монголын футзалын шигшээ баг эхний тоглолтоо Хонконгтой хийж 1-1 харьцаатай тэнцээд буй. Улмаар одоогийн байдлаар хэсгийнхээ III байрт бичигдэж байна.
Тэд дараагийн тоглолтоо өнөөдөр 17:00 цагаас Японтой, маргааш 17:00 цагаас Тайванийн багтай хийх юм. С.Эрдэнэ-Очир дасгалжуулагчийн удирдлагад "Унаганууд" клубийн П.Алтантулга, М.Чанцал, Б.Нармандах, Э.Бат-Оргил, Э.Ууганбаяр, Я.Алтансүх, Э.Ганзориг, Э.Пүрэвдорж, Б.Энхбилэг нар "Арвис" клубээс О.Есүхэй, А.Тэмүүлэн нар "Монголын тэмүүлэл" клубийн Б.Эрдэнэ-Ундрах, "Хараацай" клубээс Б.Амгаланбат, "Солонго 5" клубийн Т.Анхбаяр нар Үндэсний шигшээ багт тоглож байна.