"Улаанбаатар Их дуулга": Монголын шигшээ баг 11 медаль хүртлээ
“Парис-2024” олимпын эрхийн оноо олгох “Улаанбаатар их дуулга” тэмцээн өнгөрсөн гурвын өдрийн туршид “Степпе арена”-д явагдлаа. Уг тэмцээнд 30 орны 255 тамирчин өрсөлдсөн юм. Монгол улсыг төлөөлөн жин тус бүрт дөрөв, нийт 55 тамирчин оролцлоо. Мөн энэхүү тэмцээнд ОХУ-ын 24 жүдоч Олон улсын жүдо бөхийн холбооны нэрийн өмнөөс зодоглосон юм. Гэхдээ ОХУ-ын тамирчдыг тэмцээнд оролцохыг зөвшөөрсөнд дургүйцэн Украины баг ямар ч тэмцээн уралдаанд оролцохгүй байхаар шийдсэн билээ.
Монголын шигшээ багаас 66 кг-д Б.Эрхэмбаяр, 57 кг-д Л.Энхрийлэн нар түрүүлсэн бөгөөд 66 кг-д Г.Сод-Эрдэнэ, 73 кг-д Ц.Цогтбаатар, 48 кг-д Г.Наранцэцэг, 78 кг-д А.Адъяасүрэн нар мөнгөн медаль хүртэв. Мөн 60 кг-д Э.Сумъяабазар, 66 кг-д Ё.Басхүү, 52 кг-д Б.Хорлоодой, 57 кг-д М.Ичинхорлоо нар хүрэл медаль авсан юм. Ингэснээр медалийн тоогоороо оролцогч орнуудыг тэргүүлж, харин медалийн чанараар Олон улсын жүдо бөхийн холбоо болон Японы дараа гуравдугаар байрт жагслаа.