Ерөнхийлөгч асан П.Очирбат, яруу найрагч Ш.Гүрбазар тэргүүтэй эрхмүүдэд Төрийн шагнал хүртээв
Монгол Улсын Ерөнхийлөгч У.Хүрэлсүх шилдэг бүтээлүүдэд Төрийн шагнал хүртээв.
Тодруулбал, ШУТИС-ийн уул уурхайн салбарын тэргүүлэх эрдэмтэд, профессоруудын туурвисан “Уул уурхайн технологи, эдийн засаг, экологи” эрдэм судлалын цогц долоон боть бүтээлд Төрийн шагнал хүртээсэн юм. Уг бүтээлийн Ерөнхий эрхлэгчээр Монгол Улсын Ерөнхийлөгч асан, ШУТИС-ийн зөвлөх профессор, доктор, академич Пунсалмаагийн Очирбат, ерөнхий редактораар ШУТИС-ийн Геологи, уул уурхайн сургуулийн захирал, доктор, тэргүүлэх профессор Лхамсүрэнгийн Пүрэв, хамтран зохиогчоор Гавьяат багш, ШУТИС-ийн зөвлөх профессор, доктор Содномын Цэрэндорж, Гавьяат багш, ШУТИС-ийн профессор, доктор Жамъянхорлоогийн Цэвэгмид нар ажиллажээ.
Мөн СГЗ, яруу найрагч Шагдарсүрэнгийн Гүрбазарын эх орноо магтан дуулж, эх оронч сэтгэлгээг уншигч олон түмэн, хүүхэд, залууст түгээн дэлгэрүүлсэн “Би Монголоороо гоёдог”, “Би Монголтойгоо адилхан”, “Монголын үнэртэй салхи” бүтээлүүдэд Төрийн шагнал хүртээлээ.