1 мин

О.Даваадэлгэр: Намайг уучлаарай, би улам хүчтэйгээр эргэн ирэх болно

У.Чинзориг 2022.09.12

Монголын хөлбөмбөгийн Дээд лигийн гуравдугаар тойргийн хүрээнд явагдсан "Дэрэн" болон "СП Фалконс" багуудын тоглолтын үеэр О.Даваадэлгэр эсрэг багийн хөлбөмбөгчин Тиаго Томайс руу сармагчинг дуурайсан үйл хөдлөл гаргасан нь МХБХ-ны Сахилгын хорооноос тогтоогдсон.

Иймд МХБХ-ноос нэг жил хөлбөмбөгтэй холбоотой үйл ажиллагаанд оролцохыг нь хориглож, 5 сая төгрөгөөр торгосноос гадна клубт 10 сая төгрөгийн торгууль ногдуулаад байгаа бол "Дэрэн" клубийн удирдах зөвлөлөөс мөн тогтоол гаргаж нийтэд тустай хөдөлмөр болон санхүүгийн зэрэг тодорхой шийтгэлүүдийг оноохоор болоод байгаа билээ.

Харин О.Даваадэлгэр өчигдөр өөрийн цахим хаягаар дамжуулан хийсэн үйлдэлдээ уучлал хүслээ. Тэрбээр "Миний бие тоглолтын үеэр сэтгэл зүйгээ барьж чадаагүйн улмаас эсрэг багийнхаа Тиаго Томайс руу зүй бус үйлдэл гаргасандаа үнэхээр их харамсаж байна. Хийсэн үйлдлийнхээ төлөө та бүхнээс уучлал хүсье. Мөн хөгжөөн дэмжигчид, "СП Фалконс", "Дэрэн" клуб, МХБХ, Үндэсний шигшээ багийн ах дүү нар болон үе үеийн тамирчдаас уучлал хүсэж байна. Намайг уучлаарай, би улам хүчтэйгээр эргэж ирэх болно" гэсэн юм.

О.Даваадэлгэр хамгаалалтын байрлалд тоглодог бөгөөд 2018, 2019 онуудад залуучуудын УАШТ-ий шилдэг хамгаалагчаар тодорч, өнгөрсөн онд Азийн Цомын урьдчилсан шатанд өрсөлдсөн 23 хүртэлх насны Үндэсний шигшээ баг болон өнөө жил Азийн Цомын тэмцээний эрхийн төлөө тоглосон Үндэсний шигшээ багт дуудагдан тоглож байсан билээ. Мөн өнгөрсөн онд "Бэлгэдлийн шигшээ баг"-т багтаад буй юм.