1 мин

"Парис-2024" олимпын наадмын нээлт, хаалтын ёслолыг Томас Жолли найруулна

У.Чинзориг 2022.09.22

2

“Парис-2024” олимпын наадмын нээлт, хаалтын ёслолын найруулагчаар “Dramatique National d'Angers” театрын захирал, найруулагч Томас Жолли томилогджээ. "Түүний бүтээлч, зоримог зан чанарыг харгалзан энэхүү хариуцлагатай албанд томилсон" гэдгийг зохион байгуулагчид онцлов.

Олимпын нээлтийг цэнгэлдэхэд хийдэг уламжлалт арга барилаас татгалзаж, "Парис-2024"-ийг Сена мөрний эрэг дээр, 600 мянган үзэгчийн өмнө зохион байгуулахаар шийдвэрлэсэн билээ. Орон орны тамирчид цагаан толгойн дарааллаар завьтай жагсан орж ирнэ гэхчлэн урьд өмнөхөөс тэс өөр, өвөрмөц нээлтийн ёслолыг хийхээр зохион байгуулагчид төлөвлөөд буй юм. 

Жолли хэлэхдээ “Нээлт, хаалтын ёслолын ерөнхий төлөвлөгөөг анх сонсоод маш их сэтгэл хөдөлж байлаа. Харин одоо өөрөө энэ агуу арга хэмжээг найруулахаар боллоо. Парисын олимп нээлт гайхамшигтай сайхан болно гэсэн хүлээлт олон хүнд бий. Бид дахин давтагдашгүй, ер бусын нээлт, хаалтын ёслолыг дэлхий дахинд толилуулж чадна гэдэгтээ итгэлтэй байна” гэжээ.

Өдгөө 40 настай Жолли 2007 онд хувийн театр болох “La Piccola Familia”-г үүсгэн байгуулсан. Түүний анхны жүжиг “Arlequin Poli par l'Amour de Marivaux” олны анхаарлыг маш их татаж, шинэ залуу авьяастанд олгодог тусгай шагналын эзэн болж байв. 

Улмаар Шекспирийн сонгодог жүжгүүдийг амжилттай найруулсан нь түүний олимпын найруулагчаар сонгогдох үндэс болсныг “Парис-2024” олимпын Зохион байгуулах хорооны дарга Тони Эстанге хэлжээ.

У.Чинзориг 2022.09.22

2