1 мин

Хөлөг онгоцны залуур дээр 3 эрэгтэй 11 хоногийн турш нуугдан, амьд гарчээ

Г.Сүрэн 2022.12.02

Нигерээс Канарын арлуудыг зорьсон хөлөг онгоцонд гурван эрэгтэй нууцаар нэвтрэн, урд талын жижигхэн залуур дээр 11 хоногийн турш амьдран осгом хүйтэн цаг уурыг тэсвэрлэн амьд гарчээ. Испанийн эргийн хамгаалагчийн Твиттерт оруулсан зургаас үзвэл гурван эрэгтэй биеэ хумин суухаас өөр зай талбай байгаагүй нь харагдана.

Эргийн хамгаалагчид гурван эрийг олсон даруйдаа эрүүл мэндийн үйлчилгээнд хамруулахаар Лас-Палмас боомтод аваачжээ.

Хөлөг онгоц Нигерийн Лагос хотоос арваннэгдүгээр сарын 17-нд хөдөлсөн бөгөөд баруун хойд Африкийн нутаг дэвсгэрт 11 хоног аялахдаа 3,218 км замыг туулжээ. Энэ бүх хугацаанд гурван эр байрнаасаа хөдлөлгүй анх суусан чигээрээ явсаар ирсэн тухай албаныхан мэдээлсэн аж.

Испанийн засгийн газраас "Тэдний эрүүл мэндийн байдал сайжирч байгаа. Дүрвэгсдийн тоо нэмэгдсээр байна. Гэхдээ хүн бүхэнд ийм аз тохиохгүй гэдгийг анхааруулах нь зүйтэй" гэжээ.