180 ажилтнаа халсан Buzzfeed сайт хиймэл оюун ухаанаар контент бичнэ
АНУ-ын мэдээ мэдээллийн Buzzfeed сайт ажиллах хүчнийхээ 12 хувийг буюу 180 ажилтнаа халаад удаагүй байна. Тэгвэл тус компани хиймэл оюун ухаан ашиглан контент мэдээлэл бичихээр болсон талаараа мэдээллээ. Орчин үеийн соёл урлагийн мэдээлэл, сонжоо зэргээрээ алдартай тус сайт нь OpenAI хиймэл оюун ухааны компанитай хамтран ажиллаж, контент бүтээх гэнэ.
OpenAI-ийн чатбот нь "хүн шиг" мэдээлэлд хариу дүгнэлт үзүүлэх чадвартай бөгөөд саяхан Microsoft компани л гэхэд 10 тэрбум ам.долларын хөрөнгө оруулалт хийгээд буй. Чатботыг ашигласнаар сонжоо хийх үйл явц хялбаршиж, хиймэл оюун ухаан хэрэглэгчийн хариултуудад үндэслэн тохиромжит хариултыг үүсгэх замаар ажиллана гэжээ.
Buzzfeed компани сүүлийн жилүүдэд санхүүгийн багагүй хямралыг даван туулж байна. Тус компани оргил үедээ 1.7 тэрбум ам.долларт үнэлэгдэж байсан бол өдгөө 340 сая ам.долларт үнэлэгдэж буй.
Эх сурвалж: Wall Street Journal