Фэйсбүүк компани 'Clubhouse'-тай өрсөлдөх шинэ платформ бүтээж байна
Долоо хоногийн өмнө Фэйсбүүк компанийг үүсгэн байгуулагч Марк Цукерберг аудиогоор хоорондоо харилцдаг Clubhouse платформд нэгдэж, араасаа олон мянган хэрэглэгчдийг дагуулсан. Тэгвэл Фэйсбүүк хэдийн 'Clubhouse'-тай өрсөлдөхөөр ижил төрлийн платформ хөгжүүлж эхэлсэн тухай Нью-Йорк Таймс мэдээлжээ.
Фэйсбүүкийн удирдлагууд "ажилтнууддаа төстэй бүтээгдэхүүн бүтээхийг үүрэг болгосон" гэж хоёр ч эх сурвалж Нью-Йорк Таймст ярьсан байна. Мөн төсөл дөнгөж хөгжүүлэлтийн шатандаа явж байгаа тул хэзээ хэрэглээнд нэвтрэх талаар ярих эрт байна гэжээ.
Literally took six days pic.twitter.com/PupUNm0zOL
— Alex Kantrowitz (@Kantrowitz) February 10, 2021
Өнгөрсөн жилийн тавдугаар сард нээлтээ хийсэн Clubhouse платформ Элон Маск, Марк Цукерберг, Опра Уинфри, Эштон Катчер, Дрейк зэрэг алдартнуудыг нэгтгэж чадсанаар олон нийтийн анхаарлыг татаж, хэрэглэгчдээ хурдтай нэмж буй.
Фэйсбүүк компанийн тухайд хэрэглэгчдийн анхаарлыг татаж буй шинэ технологи, платформыг өөрийн болгох эсвэл ижил төрлийн бүтээгдэхүүн гаргадгаараа алдартай. Тухайлбал, Snapchat анх стори (story) форматыг бий болгосон бөгөөд Фэйсбүүк компани уг форматыг Инстаграмдаа, сүүлд Фэйсбүүкт нэвтрүүлсэн билээ.
Холбоотой мэдээлэл: Зөвхөн аудиогоор хоорондоо харилцдаг Clubhouse платформын тухай мэдвэл зохих 4 зүйл
Монголчууд 'Clubhouse'-т эрчимтэй нэгдэж буйг батлах 17 пост, жиргээ
Эх сурвалж: Mashable