Хайх зүйлээ бичнэ үү

3 мин

Биеийн позод нөлөөлөх 6 зуршил


Өдөр тутмын ажил амьдралын хэв маяг бидний хөдөлгөөн, түүний суурь болсон позод оролцож нөлөөлж байдаг. Поз нь гажсан ч түүнийгээ сунгалтаар засдаг хэсэг нь байхад түүнийгээ огт мэдэхгүй явдаг нь цөөнгүй. Би хэдий тогтмол дасгал хөдөлгөөн хийдэг ч поз минь үе үе өөрчлөгдчих тохиолдол байдаг учраас долоо хоногтоо заавал цаг гаргаж сунгалтын дасгал хийдэг.

Энэ сэдэвтэй хамаатай өмнөх нийтлэлүүдээрээ позын тулгуур хэсэг нь бидний аарцагны эргэн тойрон болон нурууны хэсэг талаар цөөнгүй дурдаж байсан билээ. Өөрөөр хэлбэл бидний позын тэнцвэртэй байдлыг аарцагны эргэн тойрны эдүүд хангаж байдаг юм. Бид ямар нэг гажилтад орох нөхцөлөө өөрийн мэдэлгүй зуршсан байдгаас миний ажиглалтаар хамгийн түгээмэл байдгаас нь бичлээ. Хэрэв та өдөр тутамдаа дараах маягаар сууж, эсвэл зогсдог бол аль болох ухамсартайгаар болихыг оролдох нь хамгийн эхний алхам юм.

Хөлөө байнга ачиж суух

Позыг гажуулахгүй байх хамгийн энгийн арга бол зогсох буюу суухдаа хоёр хөлөө газар бүрэн тавьж дадах бөгөөд энэ үед бидний тэнцвэр (stability) байнга ажиллаж байдаг. Бүх тохиолдолд биш ч хөлөө байнга ачиж суух нь баруун зүүн талын аарцгийн эдийг өөрчилдөг муу талтай. Нэгэнт ийм гажилтад орсон хүмүүс зогсохдоо ачигч хөлийн эсрэг тал руу бүсэлхийгээрээ эргэсэн байх нь ажиглагддаг.

Зогсохдоо өрөөсөн ташаан дээр удаан ачааллах

Түнхээ аль нэг тал руу ганхааж удаан зогссоноор жингийн төв нэг талдаа шилжиж байдаг. Мэдээжийн хэрэг биеэр жин шилжих нь хөдөлгөөний эвсэлд хэрэгтэй боловч удаан хугацаагаар нэг ташаагаа налж зогсох нь сайн биш юм. Тэгэхээр та зогсож байхдаа аль болох хоёр хөлийн улаараа жингээ тэнцүүлж зогсох нь зөв.

Суухдаа өрөөсөн хөлөө сандал дээр тавих

Гэртээ компьютер дээр сууж байгаа хүмүүст ингэж суух гээд байдаг талтай. Улмаар та хоолны ширээн дээр ч ингэж суух гээд байгаа бол таны нугалсан өвдгийн талын аарцгийн эдүүд хэдийнэ агшсан байна гэсэн үг. Дээр дурдсантай ижил та сандал дээр суухдаа хоёр хөлөөрөө газар аль болох бүрэн гишгэж дадаарай. Хэрэв нэг талын аарцгийн эд тань агшсан бол түүнийг буцааж сунгах дасгалыг дор хаяж 10–14 хоног хийгээрэй. Үүнд зориулсан сунгалт нь hip-kneeling triplanar бөгөөд ЭНД дарж дагаад хийгээрэй.

Зогсохдоо хөлийг тогтмол зөрүүлэх

Энэ тохиолдол нь нийтлэлийн хоёрдугаарт дурдагдсан шалтгаантай ижил. Өөрөөр хэлбэл төвийн жин тань зөвхөн нэг тал дээрээ удаан байвал эдүүд шилжиж гаждаг. Биеийн тэнцвэрээ сайжруулахын тулд хоёр хөлийн улыг бүрэн газарт тавьж зогсох, бүр зарим сурвалжид хөл нүцгэн зогсох нь сайн гэж бичсэн байна.

Суухдаа толгойгоо хэт урагшлуулах

Дийлэнх тохиолдолд суугаа байрлалаас бид юм унших, компьютер харах, гар утсаа ширтэх зэрэг тохиолдлуудад бидний хүзүү урагшилж, тэр нь удвал хүзүүн урд, мөрийн хэсгийн эдүүд агшаад, гажиж тогтдог байна. Энэ тохиолдолд хүзүүний урд талын агшсан булчинг сунган чангалж, хойд талын хэсгийг буцаж агшаах арга хэмжээ авах хэрэгтэй. Үүний зарим дасгалуудыг өмнөх нийтлэлээс харна уу.

Аарцаг хэсгээрээ урагш налж зогсох

Шүдээ угаах, аяга тавгаа угааж зогсох зэрэгт бидэнд ажиглагддаг зуршлын нэг. Аарцгийн хэсэг хэт урагшилсан гажилтыг бид sway-back гэдэг ба энэ нь хөдөлгөөний дутагдал, хөлийн арын булчингууд чангарсантай холбоотой бий болдог. Зүгээр зогсож байхдаа ч аарцгийн яс урагш эргэсэн ийм поз (extended lumbar) байгаа эсэхийг анзаарч байгаарай.

Позод хэрэгтэй дасгалын талаар энд дарж уншаарай.

Зөв зогсож, сууж хэвшье. 

холбоотой мэдээ
1
2020.04.28
Эрүүл мэндээ “манахад” туслах мэдүүштэй 3 зүйл
2
2020.04.21
Гүйлтийн тухай ярилцъя
3
2020.04.02
Хөл хорионы үеэр хийх 8 дасгал
санал болгох
1
2 цагийн өмнө
Халдвараас сэргийлэхийн тулд 4000 долларын үнэтэй алтан маск хийлгэжээ
2
3 өдрийн өмнө
Маргааш бүтэн өдрийг "өнгө нэмж" өнгөрүүлээрэй
3
4 өдрийн өмнө
Эрүүл бус хосын харилцааны 10 шинж

Энэ мэдээнд өгөх таны сэтгэгдэл?
3
1
2
0
0
0
0
0

Сэтгэгдэл бичих (0)
Уншигч та сэтгэгдэл бичихдээ бусдын нэр төрд халдахгүй, ёс бус, бүдүүлэг үг хэллэг ашиглахгүй байж, өөрийн болоод хүний үзэл бодлыг хүндэтгэнэ үү.