Qantas компанийн 7 цагийн нислэгийн тийз 10 минутын дотор зарагджээ
Цар тахлаас өмнө онгоцоор нисэх нь ердөө нэг цэгээс нөгөө рүү аль болох хурдан хүрэх арга байв. Харин дэлхий нийтээрээ хөл хорио тогтоосон энэ үед аялагчид холыг зорьж аялахаас гадна хуучных шигээ онгоцонд суухыг "мөрөөдөж" байна. Аялагчдын энэ хүсэл шинэ төрлийн бизнес цэцэглэх нөхцөлийг бүрдүүлж байгаа аж.
Тодруулбал, Австралийн агаарын тээврийн Qantas компани 7 цагийн агаарын аяллын үйлчилгээг нэвтрүүлжээ. Онгоц Сидней хотын нисэх онгоцны буудлаас аравдугаар сарын 10-нд хөөрөх бөгөөд Квинсланд, Шинэ Өмнөд Вэльсийн дээгүүр нисэж, Австралийн хамгийн алслагдмал, үзэмжит бүс нутгийг аялагчдад харуулаад эргэж Сиднейд газардах гэнэ. Түүнчлэн аяллын үеэр олны танил уран бүтээлч энтермайнмент үзүүлбэр үзүүлнэ гэж Qantas компанийн вэб сайтад бичжээ.
Аяллын тасалбар 566-2734 долларын үнэ бүхий гурван өөр суудалтай бөгөөд нэг онгоцонд 134 зорчигч суух боломжтой аж. Сонирхолтой нь, агаарын аяллын мэдээлэл тавигдсанаас хойш ердөө 10 минутын дотор бүх тийз зарагдаж дуусчээ. "Энэ нь Qantas компанийн түүхэнд хамгийн богино хугацаанд зарагдаж дууссан нислэг байх" гэж тус компанийн гүйцэтгэх захирал Алан Жойс мэдэгдэлдээ дурдсан байна.
Дэлхийн бусад агаарын тээврийн компаниуд ч үүнтэй ижил үйлчилгээг нэвтрүүлж байгаа аж. Тухайлбал, Японы All Nippon Airways компани өнгөрсөн наймдугаар сард Хавайн үзэсгэлэнг тольдох 1 цаг 30 минутын нислэгийг үйлджээ. Мөн Тайванийн агаарын тээврийн компани Өмнөд Солонгос улсын Чежү арлыг агаараас үзэх нислэгийг есдүгээр сарын 19-нд зохион байгуулсан байна.
Эх сурвалж: CNN
Холбоотой мэдээлэл: Хуучнаа дурсахыг хүссэн аялагчдад зориулж 'онгоцны кафе' нээгджээ