Mxrningstar-ийн анхны сингл Үүрнээсээ чигийн оргил хэсэг дэх гитар, бөмбөр, даруултат хөгжмийн найрсал нийлээд цээжин дотор өдөлсөн шувуу хэнхдэг цээжийг зад татан гарахаар тэмүүлэх мэт эрчимийг ундраагаад аажимаар хорионоосоо суллагдсан шувуу тэнгэрт эрх чөлөөтэй элин халих мэт намуусдаг. Хүмүүний тогтоон барих аргагүй хүчтэй сэтгэл хөдлөлийн тухай дуу гэлтэй. Mxrningstar нэрийн доор нэгдсэн залуус рок хөгжмийг уйтгар гуниг, хүсэл мөрөөдөл, уур хилэн, санагалзал гээд хүмүүний хүчтэй сэтгэл хөдлөл, мэдрэмжүүдийг хүргэх хэрэгсэл болгон ашиглахаар шийджээ. Хүн цомгийн эрчимтэй, динамик атмосфер хүний сэтгэл хөдлөлийн тогтворгүй бөгөөд нарийн мэдрэмтгий чанарыг төвөггүй нот болгон хэлбэржүүлсэн гэлтэй.
Хамтлагийн ахлагч Б. Аззаяа 2020 оноос Morningstar нэрээр бүтээлч чанар, хүчирхэг хоолойгоороо Youtube дээр олонд танигдсан бол өнгөрсөн жилээс эхлэн Mxrningstar нэрийн доор амьд хөгжмийн хамтлаг болон уран бүтээлийн цараагаа өргөжүүлсэн. Үүрнээсээ чи синглийг нь залган гарч буй тэдний анхны бие даасан цомог хүмүүний хязгааргүй дотоод орон зайд зөн совингоор замчлагдан бүтжээ. Цомгийн дуунуудыг Б. Аззаяа бичиж, түүний хүчирхэг хоолойн динамик шилжилтүүд пост рок, пост метал, зарим тохиолдолд ардын болон амбиент хөгжмийн элементээр баяжин бидэнд хүрч байна.
Хүн цомгийн дуунууд хэдийгээр бөмбөрийн түргэн хэмнэл, динамик шилжилтээр баялаг ч ил үзэгдэх энэхүү эрчмийн ард үндсэн дэвсгэр болсон гэмээр уй гуниг үе үе мэдрэгдэнэ. Энэ нь Mxrningstar-ийн хөгжмийг илүү олон давхаргатай болгожээ. Цомгийн нэрээр нэрлэгдсэн Хүн дуу үндэсний хөгжмийн элементүүд, ардын дуу дуулах арга барилаар эхлэх нь шууд анхаарал татна. Залгаад Франц улсад уран бүтээлээ туурвидаг Селин Дессберг өөрийн ятга хөгжмийн хамтаар донжтой чимэг нэмж, зарим тохиолдолд хэт давамгайлах гээд байдаг дуучин Б. Аззаяагийн гүйцэтгэлийг илүү тэнцвэржүүлж өгчээ. Энэ мэт туршцууд нь залуу уран бүтээлчид цаашид өөрсдийн хэв маягийг олох, уран бүтээлийн цараагаа илүү өргөжүүлэхэд тустай байх нь гарцаагүй. Энэхүү сонирхол татаж, сонор мялаах хослол Монголын хөгжимд шинэ хөг нэмэх бизээ. Цомгоос өмнө цацагдсан Гацдаа бусад дуунууд шигээ аялгуулаг шинжтэй биш илүү бөмбөрийн хэмнэлд тулгуурлан бүтсэн ч хөгжмийн найруулгын хувьд шинэлэг, экспериментал элементүүдтэй болсон нь Mxrningstar-т цаашид илүүг хүлээх итгэл төрүүлсэн.
Цомгийн бараг бүх дуунд огторгуй, хоосон зэрэг үгс тохионо. Иймд цомгийг бүхэлд нь нислэг хэмээн тодорхойлж болох мэт. Нислэг бол чөлөөлөгдөх үйл явц. Өөрөөсөө, өнгөрснөөс, хорьж цагдах эдүгээх бодит байдлаас… Нислэг бүр амжилтад хүрэхгүй, заримдаа унана, эргээд босно, ахиад оролдоно… Гэхдээ нисэх, чөлөөлөгдөх гэсэн хүсэл эрмэлзэл зогсохгүй. Нислэг бол салхи шуурга, татах хүч гээд гадаад ямар нэг хүчтэй эсвэл өөртэйгөө ч хийх тэмцэл мөн. Нөгөө талаараа хүн бодит ертөнцөд хэзээ ч бүрэн чөлөөлөгдөж нисэж чадахгүй. Тэгэхээр нислэг бол зөвхөн төсөөлөл, мөрөөдөлд эсвэл ид шидийн хүчээр л бүтэх зүйл. Ингэж харвал Mxrningstar өөр ямар нэг, үл таних ертөнцтэй холбогдож, түүний үгийг дамжуулах гэж оролджээ.
Бичээч: А.Амармэнд
Гэрэл зургийг: Agnuush
Styling: Buyana Jargalsaikhan
Mxrningstar-ийн анхны тоглолт 11-р сарын 22-нд болох гэж байна. Та бүхэн ЭНД дарж тасалбарын мэдээлэл аваарай.