Дэлхийн шилдэг хөлбөмбөгчинд олгодог БаллонДор шалгаруулалтын сүүлийн 30-д өнөө жил анх удаагаа багтаагүй Лионель Месси, Криштиано Роналду нар ФИФА-гийн оны шилдэг хөлбөмбөгчдийн өрсөлдөөнд сүүлчийн удаа нэрлэгдлээ.
Энэхүү жагсаалтад 77 хөлбөмбөгчин нэр дэвшиж, байрлал бүртээ шилдгээр сонгогдсон 11 тоглогч шагналын тавцанд гарах юм.
Тус шалгаруулалт нь мэргэжлийн хөлбөмбөгчдийн саналаар тодруулдаг цорын ганц шагнал байсан бол өнөө жилээс хөгжөөн дэмжигчид ч гэсэн саналаа өгөх боломжтой болжээ.
Довтлогчийн байрлалд Месси, Роналдугаас гадна Килиан Мбаппе, Эрлинг Хааланд, Виктор Гиокерес, Испанийн залуу авьяастнууд болох Ламин Ямал, Нико Уильямс нарыг шигшиж өрсөлдүүлэхээр зэхээд байна. Харин Салах, Левандовски нар энэхүү шалгаруулалтад багтсангүй.
Санал хураалт FIFA.com платформоор 12-р сарын 10-ны өдрийг хүртэлх хугацаанд үргэлжилнэ.
Өнөө жил Бразилийн домогт хөлбөмбөгчин Мартагийн нэрэмжит шагналыг эмэгтэйчүүдийн хөлбөмбөгт оруулсан шилдэг гоолын эзэнд анх удаагаа гардуулна.
