Бид өнгөрч буй жилийн сайн, муугаа дүгнэдэг “2024 оны сайн, муу” булангаа танилцуулж байна. Хүн төрөлхтөн сайнтай, муутай нэгэн жилээ үдэж, шинэ ондоо эрч хүчтэй, итгэл найдвартай хөл тавилаа. Мэдээж олсон амжилт, гаргасан дутагдлаа зүгээр нэг тоочоод орхихгүй, энд гарах сайн, саар зүйлсээ дүгнэн цэгнэх нь бидний үүрэг. Ингээд ирэх жилийн дугаарт энэ булангийн саар зүйлс нь арилж, сайн, сайн мэдээгээр дүүрэн байхыг хүсэн ерөөе. Сайхан баярлаарай.
Ус
Эстонийн нийслэл Таллин хотод болсон өвлийн усанд сэлэлтийн дэлхийн аварга шалгаруулах тэмцээнд Монгол Улсын тамирчин А.Эрмүүн түрүүллээ.
Сүүлийн жилүүдэд хур бороо элбэгтэй байснаас үүдэн усны осол 3.9 хувиар өсчээ.
Барилга
Үндэсний төв номын сан шинэ байрандаа нүүж орлоо.
Улаанбаатар хотын түүхэн барилгуудын нэг “Урт цагаан”-ны барилгыг буулгав.
Нүүдэл
“Монгол нүүдлийн зан үйл” өвийг ЮНЕСКО-ийн Хүн төрөлхтний соёлын биет бус өвийн Төлөөллийн жагсаалтад бүртгэлээ.
2024 онд зудын гамшгийн улмаас 7.4 сая толгой мал хорогджээ.
3х3
Сингапурт болсон Азийн аварга шалгаруулах тэмцээнээс Монгол Улсын эрэгтэй, эмэгтэй баг анх удаа хос хүрэл медаль хүртлээ.
Гэвч “Парис 2024” олимпын эрх олгох тэмцээнүүддээ харамсалтай хожигдсоноор олимпыг өнжлөө.
Зүлэг
Улсын баяр наадмыг угтан Төв цэнгэлдэхийг засаж, худалдаа үйлчилгээг эмх цэгцэнд оруулсан нь наадамчдын талархлыг хүлээв.
Гэвч шинэ зүлгэн дээр олон бөх халтирч, хүнд бэртэл авсан нь шүүмжлэл дагууллаа.
Гадаад харилцаа
Монгол Улс Бүгд Найрамдах Узбекистан Улсад Элчин сайдын яамаа нээсэн 47 дахь улс боллоо.
ОХУ-ын Ерөнхийлөгч В.Путин Монгол Улсад айлчилсан нь олон улсын анхаарлын төвд орлоо. Өнгөрөгч гуравдугаар сард Гаагт төвтэй ОУЭШ-ээс В.Путинг баривчлах шийдвэр гаргаснаас хойш анх удаа тус шүүхийн гишүүн оронд айлчилсан нь энэ юм.
Сонгууль
Монгол Улс УИХ-ын сонгуулиа анх удаа бүсчилсэн хэлбэрээр, томсгосон тойргоор зохион байгууллаа. Сонгуулийн дүнд сөрөг хүчнүүд чамлахааргүй суудал авав.
Гэвч хамтарсан Засгийн газар байгуулагдсанаар сонгогчид гонсгор үлдлээ.
Агаарын тээвэр
МИАТ ТӨХК орон нутагт нислэг үйлдэх 70 хүний суудалтай CRJ-700 Мазаалай агаарын хөлгөө хүлээн авч, анхны нислэгээ Ховд аймаг руу үйлдлээ.
МИАТ ТӨХК-ийн Хонконг - Улаанбаатар чиглэлийн ОМ298 дугаартай онгоц нислэгийн үед агаарын хөлгийн кабины даралтын заалтад анхааруулах дохио ассан тул Бээжин хотод техникийн буулт хийв.
Хөгжил
Дэлхийн 90 орчим оронд хэрэглэдэг хамгийн хялбар, найдвартай төлбөрийн хэрэгсэл болох Apple pay Монголд нэвтэрлээ.
Эрчим хүчний хомсдлын улмаас Улаанбаатар хотын зарим хэсэгт тог тасалсан нь иргэдийн бухимдлыг хүргэв.
Ном
Зохиолч Ч.Лодойдамбын “Тунгалаг Тамир”, Г.Аюурзанын “Бөөгийн домог” романууд франц хэлээр хэвлэгдэн гарлаа.
XII ангийн “Иргэний ёс зүйн боловсрол” хичээлийн номд хадам ээжтэйгээ харилцах дасгал багтжээ.
Хэвлэл мэдээлэл
Нийтийн ашиг сонирхлын төлөөх хараат бус медиаг дэмжих олон улсын тэтгэлэгт хөтөлбөрт Монголын хэвлэл мэдээллийг зургаан байгууллага (NTV, ub.life, “Зууны мэдээ” сонин, Itoim.mn, lemonpress, graph.mn) шалгаран оролцож байна.
Монгол Улс дэлхийн хэвлэлийн эрх чөлөөний индексээр 109 дүгээр байрт жагслаа.
Кино
Японы кино урлагийн А зэрэглэлийн уран бүтээлчид болох Сакай Масато, Абэ Хироши, Якүшо Коожи тэргүүтэй жүжигчдийн тоглосон “VIVANT” киноны зургийг Монгол Улсад авлаа.
2022 онд байгуулагдсан “Кино урлагийг дэмжих сан”-гийн төсвийг танав.
