Японы Каназава хотын карэ рестораны “Gogocurry” группээс мэргэжлийн сүмогийн озэки Ооносатод шинэ ёслолын маваши бэлэглэлээ. Ибараки мужийн Ами хотод байрлах Нишёоносэки дэвжээнд болсон ёслолд оролцсон тус группын төлөөлөгч “Өнгөрсөн жилийн нэгдүгээр сарын 1-нд Нотохантод болсон хүчтэй газар хөдлөлт, үерт өртсөн иргэдэд туслах манай төслийн нэгэн хэсэг нь энэ гоёлын маваши юм. Мавашид Горилла сармагчны дүрс байгаа. Ооносатог горилла шиг хүчтэй, зөөлөн байж, улам их амжилт гарган, ард иргэдэд урам зориг хайрлаасай гэсэн хүсэл мөрөөдөл шингэсэн маваши” гэж сэтгүүлчдэд тайлбарлалаа.
Озэки Ооносато “Дохён дээр сайн барилдаж, ард түмэндээ эрч хүч, урам зориг өгөхийн тлөө хичээх болно. Энэ гоёлын мавашитай зодоглох башё болгондоо түрүүлэхийн төлөө зүтгэнэ. Шинэ ондоо цол ахих зорилготой” гэж талархсанаа илэрхийлэв.
