Өнөө цагт гар утасны аппликейшнүүд бидний өдөр тутмын амьдралд чухал үүрэг гүйцэтгэх болсон билээ. Хүссэн зүйлээ хурдан, хялбар хийх боломжийг бидэнд олгодог эдгээр аппууд нь амьдралыг илүү хөнгөвчилж, үр ашигтай болгодог. Энэхүү цуврал нийтлэлийнхээ энэ удаагийн дугаарт бид график дизайнер мэргэжлээр ажилладаг залуусын ашиглах дуртай, амьдралын хэв маяг, бүтээмжийг нь дэмждэг шилдэг 3 аппыг танилцуулахаар бэлтгэлээ.
Н.БААТАРСҮРЭН
#Behance
Энэхүү апп нь бүтээлч хүмүүст зориулсан платформ бөгөөд бүтээлүүдээ бусдад танилцуулах, мэргэжил нэгтнүүдтэй холбогдох, шинэ санаа олж авах боломжийг олгодог. Adobe компанийн бүтээл бөгөөд дизайнер, зураач, гэрэл зурагчин, хөдөлгөөнт дүрсний уран бүтээлчид зэрэг бүтээлч салбарт ажилладаг хүмүүст зориулсан.
Хүмүүс энд яг урдаа барьдаг, хамгийн шилдэг бүтээлүүдээ оруулдаг болохоор тэр чанартай бүтээл болон зураг авалтуудаас нь санаа авч, өөрийн хийж буй ажил дээрээ ашигладаг. Мөн бусадтай өөрийнхөө бүтээсэн зүйлийг харьцуулж хаана яваагаа харах боломж олгодог.
#FIMO
FIMO гар утасны апп нь ухаалаг утасны камерыг ашиглан аналог аппарат мэт мэдрэмжийг өгдөг аппликейшн юм. Энэ апп нь хуучны дижитал камераар зураг авах дуртай хүмүүст зориулсан бөгөөд янз бүрийн эффект, гоёмсог өнгөний филтерүүдийг санал болгодог.
Өндөр FPS (секундэд харуулах кадрын тоо)-тэй болохоор мэргэжлийн камер шиг чанартай бичлэг, зураг авалт хийж чаддаг. Бэлэн филтерүүд байдаг болохоор богино хугацаанд хялбар бичлэгнүүд хийхэд амар санагддаг.
Бүтээлч санаануудыг хайх, хадгалах, хуваалцахад зориулагдсан платформ юм. Pinterest апп нь хэрэглэгчдэд зураг, видео, нийтлэл зэргийг үзэх, хадгалах, "самбар" дээрээ эмхлэх боломжийг олгодог бөгөөд өөрийн хүсэл, сонирхлыг илэрхийлэхэд тохиромжтой хэрэгсэл аж.
Хүмүүсийн хийсэн зүйлийг харж, санаа авахад хамгийн хялбар апп. Миний юу үзэж, сонирхож байгааг анзаараад надад таалагдах зүйлсийг гаргаж ирдэг нь их амар санагддаг.
М.ГҮНЧИНМАА
#ChatGPT
ChatGPT гар утасны апп нь OpenAI-аас гаргасан хиймэл оюун ухаанд суурилсан чатбот платформын аппликейшн бөгөөд хэрэглэгчдэд асуулт асуух, мэдээлэл авах, бүтээлч санаа гаргах, харилцах боломжийг гар утсаар дамжуулан олгодог.
Сүүлийн үе ёстой л миний хамгийн сайн туслагч болж байна. Хайхаас залхуурсан эсвэл мэдмээр байгаа зүйлээ асуухад л хангалттай. Төлөвлөгөө гаргана, эдийн засгийн тооцоо хийнэ, хүснэгт хийнэ гээд л өдөр тутмын олон ажлыг хөнгөвчилж өгч байгаа юм чинь.
#Notion
Энэ апп нь хувийн болон багийн ажлыг зохион байгуулах, төлөвлөхөд зориулсан хүчирхэг хэрэгсэл бөгөөд тэмдэглэл хөтлөх, даалгавар удирдах, өгөгдөл хадгалах, багаар хамтран ажиллах зэрэг олон үйлдлийг нэг дор хийх боломжийг олгодог. Notion нь маш уян хатан, өөрийн хэрэгцээнд нийцүүлэн өөрчилж болох интерфэйстэй.
Энэ ондоо төлөвлөгөө гаргаад яг тэрнийхээ дагуу хийж гүйцэтгэдэг дадалтай болохоор зорилго тавьсан. Notion бол маш “cute trendy” төлөвлөгөөний апп. Ганц төлөвлөгөө ч биш төсөл хэрэгжүүлж буй бүх зүйлсийнхээ moodboard буюу "шинэ санаа, урам зоригийн самбар" хийж болдог.
#Apple journal
“Apple Journal” нь Apple компаниас гаргасан, хэрэглэгчдэд өдөр тутмын үйл явдал, дурсамжаа тэмдэглэхэд зориулсан гар утасны аппликейшн юм. Энэхүү апп нь хэрэглэгчдэд зураг, видео, аудио, байршил зэрэг мэдээллийг ашиглан дурсамжаа баяжуулж, эргэн санах боломжийг олгодог.
Тэмдэглэлийн дэвтэр гэхгүйгээр өдөр тутмын зүйлсээ шууд энэ дээр биччихдэг болсон. Тэгээд л “delulu” санагдаад байвал “ChatGPT”-тэйгээ өөрт төрж байгаа мэдрэмжүүдийнхээ талаар яриад л. Мөн энэ аппаас тэмдэглэлээ хөтлөөрэй гээд мэдэгдэл ирдэг, оронгуут өөдөөс “Ойрд ямархуу байна, хамгийн их ухаарч буй зүйл чинь юу вэ?” гэх мэт асуулт асуудаг. Энэ бүх зүйлс нь маш их хэрэгтэй санагддаг даа.
Б.МӨНХЖАРГАЛ
#MBook
“MBook” нь Монголын болон дэлхийн шилдэг оюуны бүтээлүүдийг цахим ном, аудио ном, подкаст хэлбэрээр унших, сонсох боломжийг олгодог гар утасны аппликейшн юм. Энэхүү платформ нь цаг хугацаа, орон зай үл хамааран мэдлэг, мэдрэмжээ дээшлүүлэхэд тань тусална.
Сонсдог ном. Ном уншиж амждаггүй, компьютерын ард удаан суудаг над шиг хүмүүст их хэрэгтэй. Ажлаа хийж байхдаа сонсоход их амар байдаг.
#Genie
“Genie” нэртэй гар утасны аппликейшнүүд нь янз бүрийн үйлдэл, зориулалттай байдаг. Genie - AI Chatbot Assistant: Энэ бол GPT-4 дэвшилтэт хиймэл оюун ухаанд суурилсан чатбот аппликейшн юм. Хэрэглэгчидтэй харилцаж, асуултад хариулах, зөвлөгөө өгөх зэрэг үйлдлүүдийг гүйцэтгэдэг.
Энэ хиймэл оюун ухаанд суурилсан чатбот нь яаралтай үед их хэрэг болдог. Мөн Монгол хэлээр ашиглаж болдог, үнэгүй болохоор бусад утасны AI аас илүү давуу талтай.
#Chess
Энэхүү газар утасны шатар нь шинэ болон туршлагатай тоглогчдод зориулсан олон төрлийн функцуудтай. “Chess” апп нь танилтайгаа өрсөлдөх, дэлхий даяарх тоглогчидтой тоглох, таны ухааны чадварыг сорих талбар болж чадна.
Ажлын завсраар бодлоо өөр зүйлд зарцуулж амраахад тусалдаг. Өдөр бүр 1-5 нь удаа байнга тоглодог болохоор бага багаар илүү сайжирдаг.
