1935 оны энэ өдөр буюу 90 жилийн өмнө АНУ-ын Тьюпело хотод Элвис Аарон Пресли хэмээх хүү төрсөн нь ирээдүйн Рок-н-роллын Хаан байлаа.
Түүний эцэг эх нь жирийн хүмүүс байлаа. Аав нь фермер, жолооч, ээж нь хөвөнгийн талбайд ажилладаг байв. Элвис анх 10 настайдаа тайзан дээр гарч, Сүүний наадмын дууны уралдаанд тавдугаар байр эзэлжээ. Жилийн дараа аав ээж нь түүнд гитар авч өгсөн юм.
Хоёр жилийн дараа тэднийх блюзийн эх орон Мемфис хотод нүүж ирсэн нь Элвист их нөлөө үзүүлсэн юм.
Хотын Бил-стрит хэмээх гол гудамж тэр чигээрээ хөгжмийн клубтэй, Луи Армстронг, Би Би Кинг нарын алдартнууд тоглож байлаа. Элвис блюз төдийгүй кантри, жааз сонирхож, удалгүй өөрийн стильтэй (рок-н-ролл + кантри) боллоо.
1953 онд анхныхаа цомгийг Sun Records студид хийлгэж байв. 1954 онд тэрээр гитарчин Скотти Мур, Билл Блэк нартай хамт That's All Right Mama, Blue Moon Of Kentucky дууны кавер хийсэн нь том амжилт авчирсан байна. Ингээд Элвис “The Sun” студитэй гэрээ байгуулж, өмнөд мужуудаар аялан тоглолт хийж эхэллээ.
Энэ үед тэр хожим нь резин хөл гэж нэрлэгдсэн бүжгээ анх толилуулсан байна. Овертон хүрээлэнд болсон концерт дээр хөлөө гэмтээгээд мэдэгдэхгүйн тулд аянд тааруулан хөлөө сул хөдөлгөсөн нь үзэгчдэд ихэд таалагдсан тул байнга ингэж бүжиглэдэг болсон гэсэн домог бий.
Элвис шар үстэй байсан ч 1957 онд нэг найз нь цэнхэр нүдтэй залуу хар үстэй байх ёстой гэснээр хараар будсан нь жинхэнэ зөв алхам байлаа.
1950-иад оны дунд үеэс ид алдаршсан Элвис дуулж, бүжиглэж, кинонд тоглон, олон сая хүний шүтээн болсон байлаа. Гэвч армид алба хаасан хоёр жил түүний замналд золтой л цэг тавьж орхиогүй. Харин Пресли тайзан дээрээ эргэн ирж, дахин шуугиулж чадсан юм.
1970-аад онд алдар хүндийн оргилоос бууж, хаан нэрээ алдсан ч түүний концерт үргэлж танхим дүүрэн хүнтэй болдог байлаа.
1977 онд Индианаполист сүүлчийн концертоо хийгээд хэдхэн долоо хонгийн дараа тэр энэ ертөнцийг орхисон. 42 настай Элвисийг эм хэтрүүлэн хэрэглэсэн гэж эмч нар оношилсон юм.
Гэвч түүний шүтэн бишрэгчид түүнийг одоо хүртэл амьд хэвээр байгаа гэж итгэдэг. Шоу ертөнцөөс уйдсан Элвис үхсэн мэт олон нийтэд зарлуулаад өөр нэрээр дэлхийн хаа нэгтэй амьдарч байгаа гэдэгт тэд итгэхийг хүсдэг.
Магадгүй үнэн ч байж болох юм.
