Өнөөдөр Бүх дэлхийн “Битлз”-ийн өдөр. Энэ өдрийг 2001 оноос эхлэн ЮНЕСКО-гийн шийдвэрээр тэмдэглэдэг болсон юм. Жил бүрийн нэгдүгээр сарын 16-нд хөгжим сонирхогчдын чихэвчнээс Yesterday, Yellow Submarine, Let It Be зэрэг Битлз хамтлагийн алдарт дуунууд эгшиглэж байгаа нь сонсогддог билээ. Жил бүрийн нэгдүгээр сарын 16-нд Битлз хамтлагт зориулсан төрөл бүрийн арга хэмжээ дэлхийн өнцөг булан бүрт явагддаг.
Нэгдүгээр сарын 16 гэдэг өдрийг тохиолдлоор сонгоогүй. 1957 оны энэ өдөр Ливерпульд “The Cavern” гэдэг клуб байгуулагдсан нь тэр үед хэн ч мэддэггүй байсан Жон Леннон, Пол Маккартни, Жорж Харрисон нарын агуу замналын эхлэл болсон ажлын газар нь байжээ. Гэхдээ тэд өөр өөр хамтлагт байсан бөгөөд хожим нь Ринго Старр нэгдсэн түүхтэй.
Яг “The Beatles” нэрээрээ тэд “The Cavern” клубт анх удаагаа тоглосон нь 1961 оны хоёрдугаар сарын 9. Ингээд алдарт дөрвөл энэ клубт байнга тоглодог болж, шүтэн бишрэгчид нь ч цуглардаг болжээ. 1963 онд “Please Please Me” дуугаа гаргасны дараа даян дэлхий даяар “битломан” хэмээх үзэгдэл үүссэн түүхтэй.
Нэгдүгээр сарын 16-нд бас нэгэн чухал үйл явдал тохиолдсон нь 1964 онд “Cashbox” сэтгүүл тус хамтлагийн “I Want To Hold Your Hand” дууг АНУ-ын хит парадын нэгт тавьсан явдал байлаа. Харин алдарт “Yesterday” дуу 1965 онд олны хүртээл болсон. Энэ дууг Би Би Си 1999 онд уншигчдын дунд явуулсан санал асуулгаараа ХХ зууны шилдэг дуугаар шалгаруулж байв.
1967 оны зургаадугаар сарын 25-нд Битлз тоглолт нь хиймэл дагуулын телевизээр дэлхийд цацагдсан анхны хамтлаг болсон. Тэр өдөр тоглолтыг 400 сая хүн үзсэн байдаг. The Beatles хамтлаг найман жилийн дотор 240 дуу, 13 цомог гаргасны дуу болгон нь хит болж байлаа. Rolling Stone сэтгүүлээс “The Beatles” хамтлагийг Бүх цаг үеийн шилдэг уран бүтээлч гэж тодорхойлсон.
