Японы сүмо бөхийн холбооноос өнөөдөр өглөө манай Хоошёорюүд албан ёсоор ёкозүна цол олголоо. Холбооноос Сакайгава ояката, Оонарүто ояката нарыг элч төлөөлөгч болгон илгээсэн бөгөөд Тацүнами ояката гэргийн хамт угтан авлаа.
Хоошёорюү холбооны шийдвэрийг сонсоод “Талархан хүлээн авч байна. Ёкозүнагийн нэр хүндийг унагаахгүй, сэвтүүлэхгүйгээр хамаг сэтгэл, хүчээрээ тууштай хичээн зүтгэх болно. Өнөөдөр та бүхэнд их баярлалаа” гэж хэлэн аварга цолоо хүлээн авлаа. Мэргэжлийн сүмо бөхийн 74, Монголын 6 дахь ёкозүна ийнхүү ажилдаа орлоо гэхэд болно.
Хоошёорюү – С.Бямбасүрэн. 1999 оны тавдугаар сарын 22-нд төрсөн. Улаанбаатар хотын уугуул. 11 настайгаасаа чөлөөт бөх, жүдо барилдсан. Японы ахлах сургуулийг төгсөөд Тацүнами дэвжээнд элссэн. 2018 оны нэгдүгээр сараас барилдаж, 2019 оны 11 дүгээр сард жюүрёо, 2020 оны Намрын тэмцээнд дээд зиндаанд дэвшсэн. Өнгөрсөн жилийн Нагоя башёд түрүүлээд озэки цол хүртсэн. 188 см өндөр, 148 кг жинтэй.
