Гуравдугаар сарын 14 бол математикт хайртай, сонирхолтой хүн бүрийн баярын өдөр буюу “Пи” тооны өдөр. Бид бүгдийн мэдэх “Пи” тоо нь тойргийн уртыг диаметрт нь харьцуулсан иррациональ тогтмол тоо билээ.
Физикч асан Ларри Шоу 1988 онд “Exploratorium” музейд хамгийн анх “Пи” өдрийг тэмдэглэсэн нь өнөөг хүртэл уламжлал болж, 2009 оны гуравдугаар сарын 12-нд АНУ-ын Конгресс “Пи” өдрийг үндэсний баяр болгон зарлажээ.
1. Хэдийгээр “Пи” тоог 3.14 хэмээн товчилдог ч энэ нь төгсгөлгүй үргэлжлэх тоо юм. Өнгөрөгч наймдугаар сард Швейцарын Хэрэглээний Шинжлэх Ухааны Их сургууль “Пи” тооны 62 триллион ( 62,831,853,071,796) орныг тооцоолжээ. Үүнийг тооцоолоход 108 өдрийг зарцуулсан байна.
2. 2015 оны гуравдугаар сарын 21-нд Ражвир Миена “Пи” тооны 70000 орныг 10 цагийн турш цээжээр хэлэн Гиннесийн амжилт тогтоожээ.
3. НАСА ямар нэгэн тооцоолол хийхдээ “Пи” тооны зөвхөн эхний 16 орныг ашигладаг.
4. “Супер Пи өдөр”-ийг 2015 оны гуравдугаар сарын 14-ний өдрийн 09 цаг 26 минут 53 секундэд тэмдэглэжээ. Энэ нь “Пи” тооны эхний 10 орон юм.
5. Зарим математикчид “Пи” тооны өдрийг биш "Тау" тооны өдрийг тэмдэглэх нь илүү зохимжтой хэмээн маргадаг. Учир нь ихэнх томьёонд “Пи” тоог хоёроор үржүүлэн ашигладаг бөгөөд энэ нь “Тау” тоо юм. Таугийн өдрийг зургаадугаар сарын 28-нд тэмдэглэдэг.
6. Грекийн π үсэг буюу “Пи” тооны тэмдэглэгээ нь периметр гэх үгийн эхний үсэг юм.
7. Альберт Эйнштейн 1879 оны гуравдугаар сарын 14-нд төрсөн. Стивен Хокинг 2018 оны гуравдугаар сарын 14-нд 76 насандаа таалал төгссөн билээ.
8. “Пи” тоог хэмжээ хамаарахгүйгээр бүх төрлийн дугуй дүрсэд ашиглаж болдог.
9. “Пи” тооны эхний 100,000 бутархай оронд "1" тоо хамгийн их буюу 10000 гаруй удаа давтагддаг.
10. “Пи” өдрийг тохиолдуулан АНУ-д маш олон газар пицца болон бялуугаа хямдруулан, 3.14 доллароор зардаг.
Нийтэлсэн: Э.Талстболор
