1 мин

Д.Сарангэрэл хүний эрхийн зөрчил, ёс зүйн алдаа гаргаж, сайдаас огцорлоо

Б.Энхцэцэг 2022.09.27 1

Ерөнхий сайд Л.Оюун-Эрдэнэ сайд нарын танхимынхаа нэг гишүүнийг огцруулах захирамжийг Токиогоос яаралтай гаргав. Засгийн газрын хэрэг эрхлэх газрын дарга Д.Амарбаясгалан өнөөдөр хэвлэлийн хурал зарлаж, энэ тухай мэдэгдлээ. 

Хөдөлмөр, нийгмийн хамгааллын сайд Д.Сарангэрэл өчигдөр Төрийн ордонд болсон “Халамжаас хөдөлмөрт” хэлэлцүүлгийн үеэр сэтгүүлчдэд өгсөн мэдээлэлдээ “Манай яамныхан ядуурлын түвшнээс дор байгаа айлуудыг “улны” хэмээн нэрлэдэг” гээд ийм 1500 өрхийн гишүүдэд ажил хөдөлмөр эрхлэхэд нь дэмжлэг үзүүлэх тухай мэдэгдсэн нь олны бухимдлыг төрүүлэв. Тэрбээр өнөөдөр “Болгоомжгүй үг сонгож алдаа гаргасандаа миний бие хүлцэл өчиж байна” гэж мэдэгдсэн боловч нийгмийг бухимдуулсан сайдыг үүрэгт ажлаас нь огцруулах шийдвэр даруй гарлаа. 

Д.Амарбаясгалан “УИХ, Засгийн газрын бодлогыг танилцуулах чуулганы үеэр ХНХ-ын сайд мэдээлэл хийхдээ гаргасан алдаанаас ард түмэн ихээхэн дургүйцэж, Засгийн газарт хаяглан хоёр өдөр дараалан шүүмжиллээ. Тиймээс бид ард иргэдээсээ хүлцэл өчиж байна. Д.Сарангэрэл сайд Үндсэн хуулийн 14, 19 дүгээр зүйлүүдэд заасан хүний эрхийн заалтуудыг зөрчсөн учраас Ерөнхий сайд Л.Оюун-Эрдэнэ захирамж гаргасан” гэв. Д.Сарангэрэл өөрийн зүгээс хүний эрхийн зөрчилтэй, ёс зүйн асуудал гаргаснаа гүнээ ухамсарлаж, албан тушаалаас чөлөөлөгдөх хүсэлтээ давхар гаргасан аж. Дараагийн сайд томилогдох хүртэл ЗГХЭГ-ын дарга Д.Амарбаясгалан Хөдөлмөр, нийгмийн хамгааллын сайдын ажлыг хариуцан ажиллах юм байна.

Хуулийн дагуу сайдыг огцруулахад Ерөнхийлөгчтэй зөвшилцдөг бөгөөд энэ үйл явц мөн эхэлжээ.  

Б.Энхцэцэг 2022.09.27