Турк, Сирид болсон газар хөдлөлтийн улмаас амиа алдсан хүмүүсийн тоо 11 мянгад хүрээд байна. Өнөөдөр Далай лам НҮБ болон Дэлхийн Хүнсний хөтөлбөрийн тэргүүнд захидал илгээн, Турк, Сирид олон мянган хүний амь эрдсэнд эмгэнэл илэрхийлэн, Далай ламын дэргэдэх сангаас аврах ажиллагаанд дэмжлэг үзүүлэхээ мэдэгдлээ.
Тэрээр "Ойр дотны хүмүүсээ алдсан гэр бүлүүдэд чин сэтгэлийн эмгэнэл илэрхийлэн, эл харуусалт явдалд нэрвэгдсэн бүхий л хүмүүсийн төлөө бид залбирч байна. Газар хөдлөлтийн голомт дахь аврах, эрэн хайх, эмчлэн сувилах үйл ажиллагаанд олон улс орон тусламж дэмжлэг үзүүлж буйд талархаж байна. Турк, Сирийн ард иргэдтэй эв санааны нэгдэлтэй буйгаа илэрхийлэн Далай ламын дэргэдэх сангаас хүмүүнлэгийн дэмжлэг яаралтай илгээхээ амлаж байна" хэмээжээ.
Турк, Сири улс нь хэд хэдэн геологийн хавтангуудын харилцан үйлчлэлийн цэгт оршдог байна. Туркийн газар нутгийн дийлэнх хэсэгт газрын гүн дэх тектоник хавтан байрлах нь газар хөдлөлтийн эрчимтэй бүст тооцогдох юм.
Эх сурвалж: The Diplomat
