2 мин

Рубиалесийн ээж хүүгийнхээ төлөө сүмд өөрийгөө түгжиж, өлсгөлөн зарлалаа

У.Чинзориг 2023.08.29 1

Испанийн хөлбөмбөгийн холбооны ерөнхийлөгчийн албан тушаалаас түр хугацаагаар түдгэлзээд буй Луис Рубиалесийн ээж Анхелес Бежар даваа гарагийн өглөө Гранадагийн ойролцоох Мотрил хотын сүмд өөрийгөө түгжиж, шударга ёс тогтоогдох хүртэл "өдөр шөнөгүй, тодорхойгүй хугацаагаар"  өлсгөлөн зарлажээ.

Ес дэх удаагаа зохион байгуулагдсан эмэгтэйчүүдийн хөлбөмбөгийн ДАШТ-ий шигшээ тоглолтын үеэр Рубиалес Испанийн хөлбөмбөгчин Женни Хермосог үнссэн нь дуулиан дэгдээж, улмаар ФИФА-гийн Сахилгын хороо түүнийг 90 хоногийн хугацаанд үүрэгт ажлаас нь түдгэлзүүлээд байгаа билээ. Үүний дараагаар Испанийн хөлбөмбөгийн холбооны (RFEF) 11 ажилтан албан тушаалаасаа огцорчээ.

Сүмийн тахилч сүмээсээ гарах үед Бежар эгчийнхээ хамт сүмийг дотроос нь түгжсэн аж. Луис Рубиалесийн ээж Женни Хермосог "Үнэнээ хэлэхийг" шаардаж, "Анх хэлж байсан үгээрээ байхыг" хүссэн байна. Женни одоогоор мэдүүлгээ гурвантаа өөрчлөөд буй юм. Хамгийн сүүлд баасан гарагийн өглөө хийсэн мэдэгдэлдээ "Би түүний үнсэлтийг хэзээ ч зөвшөөрөхгүй" гэсэн ажээ.

Бежар "Хүүд маань яагаад ийм хэрцгий хандаад байгаа юм бэ? Энэ бүх үйл явдлын ард ямар ашиг сонирхол байгаа юм бэ? гэдэгт би гайхаж байна. Хүү маань хэнд ч хор хөнөөл учруулж, хэнийг ч гомдоох хүн биш. Зурган дээр харагдаж байгаачлан хоёул зөвшилцөж үнсэлцсэн тул бэлгийн хүчирхийлэл гэж үзэх боломжгүй" гэж мэдэгджээ.

Зарим хамаатан садан нь түүнд өнөө өглөө ус, эм авчирчээ. Учир нь Рубиалесийн ээж өвчтэй агаад байнгын эм уудаг аж.

Испанийн прокурорын газраас Луис Руиалесийн эсрэг бэлгийн хүчирхийлэл үйлдсэн хэргээр мөрдөн байцаалтын ажиллагааг эхлүүлээд байгаа юм. Тэд Руиалесийн үнсэлтийг "бэлгийн хүчирхийллийн гэмт хэрэг байж болзошгүй" хэмээн шалгаж байна. 

Эл дуулиан аажим аажмаар хүрээгээ тэлсээр байгаа юм. Тухайлахад, Испанийн Засгийн газрын гишүүд түүнийг огцрохыг шаардсан ч Рубиалес харин татгалзжээ. Ингэснээр Испанийн Засгийн газар хөлбөмбөгийн үйл ажиллагаанд хөндлөнгөөс оролцохыг хориглосон ФИФА-гийн дүрмийг зөрчиж, Испанийн бүх түвшний клуб болон Испанийн шигшээ багуудыг олон улсын тэмцээнүүдээс хасахад хүрч ч магадгүй нөхцөл байдал үүсээд байна.

Мөн Испанийн хөлбөмбөгийн холбооны дээд албан тушаалтнууд даваа гарагт яаралтай хуралдаж, түүнийг "Испанийн хөлбөмбөгийн нэр хүндэд ноцтой хохирол учруулсан" хэмээж, нэн даруй ажлаа өгөхийг шаардах болжээ.

Үүний сацуу Испанийн шигшээ багийн 23 тоглогч Рубиалесийг удирдаж байгаа цагт Үндэсний шигшээ багтаа тоглохгүй гэсэн захидалд гарын үсгээ зураад байна. 

У.Чинзориг 2023.08.29