1 мин

Улсын харцага Ш.Пүрэвгарьд есөн жилийн дараа заалны барилдаанд түрүүллээ

У.Чинзориг 2023.09.11 1

Монгол улсад барилгын салбар үүсэж хөгжсөний 97 жилийн ойд зориулсан, "Нутгийн Буян" группийн нэрэмжит, намрын нээлтийн барилдаан өчигдөр Монгол бөхийн өргөөнд явагдлаа. Эл барилдаанд улс, аймгийн цолтой 128 бөх зодоглосноос Завхан аймгийн Баянтэс сумын харьяат улсын харцага Шархүүгийн Пүрэвгарьд түрүүлж, Дундговь аймгийн Эрдэнэдалай сумын харьяат улсын өсөх идэр начин Эрдэнэбатын Даш үзүүрлэв.

Ш.Пүрэвгарьд улс, аймгийн цолтой бөхчүүдийн барилдаанаас анхны түрүүгээ хүртсэн нь энэ. Тэрбээр 2014 онд аймгийн арслан цолтой байхдаа аймаг, цэргийн цолтой бөхчүүдийн барилдаанд түрүүлж байсан юм. Харин улс, аймгийн цолтой бөхчүүдийн барилдаанд үзүүлсэн хамгийн өндөр амжилт нь дунд шөвөг байв.

Тэрбээр өчигдөр улсын харцага О.Мөнх-Эрдэнэ, Б.Зоригтбаатар, улсын начин Э.Даш, Д.Хүдэрбулга нарын тэргүүтэй ид амжилттай барилдаж байгаа шилдэг бөхчүүдийг давсан юм.

Их шөрөвт Ховд аймгийн Буянт сумын харьяат улсын аварга О.Хангай, Архангай аймгийн Батцэнгэл сумын харьяат улсын үнэн зоригт харцага Б.Зоригтбаатар нар шалгарчээ.

У.Чинзориг 2023.09.11