Тулгар төрийн 2232 жил, Их Монгол Улсын 817 жилийн ойн Үндэсний их баяр наадмын хүчит бөхийн барилдаанд Архангай аймгийн Цэнхэр сумын харъяат улсын гарьд Мягмарын Бадарч түрүүлж, улсын арслан цолонд хүрсэн билээ.
Гэвч Үндэсний их баяр наадмын үеэр түүнээс авсан шинжилгээгээр метенолон гэх допингийн төрлийн бодис илэрсэн тул Үндэсний их баяр наадмыг зохион байгуулах Үндэсний бөхийн салбар комиссоос түүний барилдах эрхийг дөрвөн жилээр хасч, "Улсын арслан" цолыг нь хураах шийдвэр гарган, Монгол Улсын Ерөнхийлөгчид өргөн барихаар болжээ.
Уг асуудалтай холбогдуулан Улсын арслын М.Бадарчийн зүгээс өнөө өглөө хоёр дахь удаагаа тайлбар хийлээ.
Тэрбээр 12 жилийн хугацаанд Үндэсний бөхөөр барилдахдаа "Эл спортод сэтгэл зүрх, цаг заваа бүрэн дайчилж өдий зэрэгт хүрсэн. Мөн өөрийн олон жилийн хичээл зүтгэлийн үр дүнд сумын начинаас улсын арслан цолонд хүрч, төр, ард түмнийхээ хайр хүндэтгэлийг хүлээх болсон. Би барилдах хугацаандаа улсын наадам болон заал танхимын барилдаанд явцын шинжилгээг байнга өгсөөр ирсэн билээ. Мэдээж шинжилгээ авах асуудлыг дэмждэг, харин шинжилгээ авах явц хууль журмын дагуу өрнөсөн эсэхэд миний бие одоо ч итгэл үнэмшил бага, гомдолтой байна. Мөн дээрх асуудал нийгэмд эргэлзээ, тээнэгэлзээ төрүүлж байгааг та бүхэн минь надаар хэлүүлэхгүй мэдэх билээ. Иймд миний бие олон жилийн хүч хөдөлмөрөө хамгаалж, хардах эрхийнхээ хүрээнд дээрх асуудалд цаашдаа нухацтай хандах болно гэдгээ албан ёсоор мэдэгдэж байна. Мөн өдийг хүртэл намайг дэмжиж байсан багш, гэр бүл, нутаг нугийнхан, бөх сонирхогч ард түмнээсээ, мөн намайг дэмжиж, тусалж байсан бүх хүмүүст баярлалаа гэж хэлэхийн сацуу уучлалт хүсч байгааг минь хүлээн авна уу. Монгол төрийн маань алтан соёмбо сэвгүй тунгалаг байж, монгол наадам, монгол бөхийн маань ногоон дэнж сэвгүй ариун байх болтугай. Та бүхнээ хүндэтгэсэн Монгол улсын арслан М.Бадарч" гэжээ.
М.Бадарч арслангийн хувьд, допингийн хариуг хүлээн зөвшөөрөхгүй гэдгээ мэдэгдэж, Арбитрийн шүүхэд хандахаар болоод байна.
