1 мин

Ц.Бямба-Отгон улсын гарди цолтой анхны түрүүгээ "Монгол бахархлын өдөр"-өөр хүртлээ

У.Чинзориг 2023.11.15

Их эзэн Чингис хааны эснэсэн өвлийн эхэн сарын шинийн нэгнийг "Монгол бахархлын өдөр" хэмээн тунхаглаж, хотол даяараа тэмдэглэн өнгөрүүлдэг билээ.

Өнөө жил тус өдөрт зориулсан үндэсний бөхийн барилдаанд улсын шинэхэн гарди Ц.Бямба-Отгон ур, бяраар тэгширснээ бататгаж, нэвтхэн гүйсээр түрүүллээ. Тэрбээр улс аймгийн цолтой бөхчүүдийн барилдаанд хоёр дахиа, улсын гарьд цолтойгоор анхны түрүүгээ хүртсэн нь энэ.

Өвөрхангай аймгийн Төгрөг сумаас 77 жилийн дараа улсын цолтой бөх төрсөн нь Ц.Бямба-Отгон. Тэрбээр заал танхимын барилдаануудад 2017 оноос эхлэн зодоглосон бөгөөд сумын цолтой бөхчүүдийн барилдаанд хоёр удаа, аймаг цэрэгт нэг удаа түрүүлсэн амжилттай. Ц.Бямба-Отгон өнөө жилийн Үндэсний их баяр наадмаар тав, зургаа, долоогийн даваануудад дараалан тунаж барилдаад давснаар Улсын гарди цолонд хүрсэн юм.

"Монгол бахархлын өдөр"-т зориулсан барилдаанд улсын заан М.Лхагвагэрэл үзүүрлэж, улсын заан Б.Бат-Өлзий, улсын харцага Н.Золбоо нар Их шөвөгт шалгарсан. Мөн энэ өдөр Ховд аймгийн арслан М.Баяржавхлан гоц сайн барилдаж, улсын аварга О.Хангай, улсын начин Д.Амаржаргал, О.Түмэн нарыг дараалан хаяснаар шөвгийн наймд үлдсэн юм.